山頂紅莓閣一期由九倉及怡和共同持有，昔日多大班及銀行家居住。
中環人語
吳光正「愛屋及烏」
與吳光正女兒吳宗恩結婚五年的英籍律師馬健能（ John Paul McLellan），本來住山頂白加道五十一號一個細單位，去年搬到山頂紅莓閣大屋居住，呢個山頂富貴屋苑是九倉及怡和旗下物業，睇嚟外父吳光正都好「睇」呢個女婿，且將包 Sir愛婿風範傳承下一代。
觀乎吳光正七三年與船王包玉剛次女包陪容結婚，七五年才正式成為包 Sir旗下環球航運董事，貴為船王女婿，都要有個見得人蝸牛殼，當時已婚的吳光正報住寶珊道碧苑單位，物業屬「襟兄」蘇海文名下，並由外父環球航運承造按揭，可見在包 Sir支持下，姊妹以及襟兄弟都手足情深，互相支持，後來包陪容以一百一十萬元購入半山嘉慧園後，兩夫婦正式在那兒築愛巢；睇住屋的安排，當年外父包 Sir當正吳光正係「半邊仔」，到今日吳光正同樣安排女婿——馬健能進駐九倉旗下山頂大宅，呢啲實際地「愛屋及烏」。
收股票好過出糧
喺騰訊打工，不求加人工之幅度，只求有 share options，多年來騰訊除向董事授出認股權外，集團僱員都有份，分別在去年三月及七月向僱員授出共八百萬股認股權，一批行使價只是$158，另一批是$174，短短一年多，騰訊股價升一倍有多，最和味係兩批貨今年三月及七月已可行使，獲得呢批認股權嘅員工發達速度最快，真係收股票好過出糧。
中環寸嘴 高官千祈咪傲慢與偏見
工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。
上個禮拜去灣仔新開張龍門棧踩場，一去到撞到揸弗人 Alan Tam，唏，真係同佢熟到唔熟，之前喺四季酒店後來去大官廳，佢話：「千祈唔好寫，我哋生意做唔切！」哈哈，真係寫食經咁耐差啲俾佢拋到，話間嘢初初幾個老細搞，後來變咗十幾個老細，晚晚爆場，八月都冇放過假喎！
上期承蒙網上讀者 N C Trophy賜教，叫我 be gentle，香港個摩天輪唔好叫「死眼」，可以叫「 sea eye」，呢位讀者英文及中文修為都好過我，係好就要話好嘛！
幾個月前，班官為擴建迪士尼申請撥款五十幾億，又話不能以商業角度睇，係旅遊基建，家陣個摩天輪又唔聽佢咁講？上個禮拜迪士尼 CEO預告全年業績會令人失望，股價跌 5%，而家香港政府俾埋錢幫迪士尼逃出困境就真，正式 mickey mouse production，使鬼咁大投資咩，懇請啲官不要懶到出汁，度多幾項旅遊基建仲實際！代表政府新委任入去迪士尼個 board啲高官，希望唔好俾美國公司睇低，不過我對佢哋用英文表達程度有保留，去唐人街學多幾年英文先嚟，千祈咪上演「傲慢與偏見」先得！
見到前塵會長出晒嚟，迷信褪色招牌，青少年點信服？
唔知道什麼是 up& coming，睇攤路先考你功夫！
呂志和先聲奪人
強颱風「天鴿」仍有餘波，閱讀銀娛主席呂志和發出的信，果然好似《愛心滿東華》司儀讀出善長銀碼咁，有「先聲奪人」之效果，呂志和或其文膽寫道：「在如此挑戰的時刻，我宣布捐助澳門幣六千萬元，銀娛基金會及呂氏家族各三千萬元。」這樣說法，小宗誤以為總數捐一億二千萬，其公關焦急來電澄清，原來意指總數為六千萬，當中銀娛基金會及呂氏家族各佔三千萬而已；其實即使捐一億二，人稱「和哥」的呂志和都綽綽有餘，又何須怕出頭呢？有東華前總理告知，八一年仍在做建材揼石仔生意的呂志和好努力咁登上東華三院主席，後來貴為新賭王後，每逢東華捐款都非常之豪氣表明「有大 project先好叫我捐」。今時今日，每年頒呂志和獎予國際知名學者或機構，每個獎金兩千萬港元，澳門有乜需要，和哥隨時「加碼」都得。
|
鍾意就快D Share啦！
|
|
|
