(新增影片)司馬燕轉眼離世兩年多，佢老公吳忠義（Togi）同一對仔吳澋滔（Ian）及吳景燿（Brian）都展開生活，Togi撫平喪妻之痛，去年已覓得第二春，戀上新女友Beth，兩人情路再遇，因為各自有過唔同經歷，特別珍惜對方，越愛越甜蜜。
讀者盧太日前透過《蘋果》嘅「爆相爆片」，分享咗Togi同Beth拍拖搭港鐵嘅照片，同行還有一小女孩。盧太日前接受電話訪問時話：「當日下午1點多，我見到吳生（吳忠義）同佢女朋友喺坑口搭港鐵，同行仲有個細路女，佢哋最先喺一齊企，但後來有座位，吳生同女友同小妹妹坐低，其間吳生同女友好好傾，女朋友講嘢比較多，男嘅只係聽，車廂都有乘客眼望望。」據知小妹妹就係Beth嘅囡囡，Togi同Beth相處融洽，雙方已融入彼此家庭，Beth曾同Togi三父子合照，Togi上月牛一，兩子同Beth齊齊為壽星仔慶生，而Togi也愛屋及烏，對Beth嘅囡囡亦細心照顧。
《蘋果》聯絡過Togi，佢用英文透過短訊回覆話：「噢，沒有人對我有興趣啦，我想生活低調一些。」Togi表示近日比較忙，因為佢決定離開香港，稍後移居新加坡，其實早年佢同司馬燕新婚時都在新加坡生活過一段時間。Togi在港親人不多，加上佢有感對香港政治沒有希望，索性到新加坡生活。
至於兩子嘅近況，Togi話：「他們很好，Ian喜歡玩音樂，Brian就到了多倫多進修。」Togi指Ian想返港，但幼子Brian較喜歡加國，兩兄弟暫未有回港計劃。
|
鍾意就快D Share啦！
|
|
|