前大律師林作自從冇做律師後，分別喺教育界同演藝界進軍，幕前幕後都撈埋，雖然瓣數多，不過都只係自由身接job。到近日，林作終於自爆簽咗俾范振鋒，對方「包起」自己3年。林作正式成為藝人。
林作做藝人，有人認為富二代冇經濟壓力，入行純粹媾女過戲癮，不過林作今日喺Ig留言話：「實不相瞞，屋企最近環境急轉直下，已經在蘊釀出售層所謂豪宅。」仲hashtag咗「下海」」、「地產經紀請揮手」。
睇番林作位於半山嘅麥當勞道3,400呎複式豪宅，1年前林作媽媽豪擲6,500萬買入，現時市值已逾8千萬。(新聞連結： http://bit.ly/2kiUP0S )當時有指林作媽媽打算買嚟留俾林作同麥明詩作新婚愛巢之用。
對於賣樓套現，林作接受《蘋果》訪問時直認不諱：「係呀，阿媽有日好語重深長同我講，話『阿仔，我哋今時唔同往日』估計佢生意出咗啲問題，但詳細情況，就真係要問佢先知。我哋同會計師商量過，我又問過啲地產朋友，要減低媽咪負擔，最折衷嘅辦法，就係賣樓套現。其實簽俾范振鋒入行，都係因為呢個原因想搵多啲錢，最好返埋大陸，唔好話食蟲、剃毛都仲得呀。」
問林作若然大屋搬細屋，會唔會覺得唔慣，佢笑笑口咁話：「以前喺外國讀書，都成日搬嚟搬去，細屋大屋都住過，或者住女友屋企，將來入埋贅都冇問題。」
話晒以前間屋諗住當新婚愛巢，不過林作就話冇唔捨得：「o依家連拖都冇得拍，愛乜鬼巢呀，不過我冇得住呢間屋，都有樣好，就係可能會大快人心，相信負評都會少啲。」
| (資料圖片) | | |
| | | |
| | | |
| |
|
鍾意就快D Share啦！
|
|
|