張智霖（Chilam）、袁詠儀（靚靚）、李家鼎、鄺美雲（Cally）、四太梁安琪及黃玉郎與未婚妻Cass等，今晚喺鴨脷洲出席長者盆菜宴。靚靚話未試過食盆菜，所以跟埋老公Chilam一齊出席，問到囝囝慕童（魔童）點解唔一齊嚟，靚靚話：「阿仔最近好忙佢嘅滑板事業。」
之前Chilam被拍到帶魔童去玩滑板，但就冇做安全準備，搞到靚靚嬲爆話：「都唔明點解可以喺冇安全措施下玩滑板！唔明啲家長點解會容許？嗰兩父子應該知道邊個！如果跌斷腰骨咁點算？咁就一世㗎喇！」佢身旁嘅Chilam即點頭示意認錯，靚靚即刻再話：「我諗呢啲公眾場所要立例，要配戴安全措施先可以玩，否則唔可以入場。」問到有冇同囝囝約法三章？靚靚話：「囝囝好乖嘅，但係功課唔理想就會搵爸爸。」Chilam笑言自己係「sugar daddy」，任何事都會應承，問佢會唔會縱壞囝囝？佢即話：「我錫得嚟都好有分寸嘅。」
至於同場嘅鼎爺，就話自己鼎爺話往年都有參與呢項活動，佢同現場人士say個hi後就要趕返公司拍節目，佢話：「嚟緊會上華東同上郵輪講talk，屋企人都唔得閒一齊去。」提到鼎爺下月1號嘅72歲生日，問佢想唔想女友送驚喜？佢就話：「到時至算幾廿歲人，都冇乜驚喜啦，唔通話畀你聽有咗咩？咁就驚奇嘞！」
另外，Cally身穿印有Cash & family字樣嘅紅色T恤現身，佢話：「Cash & family嚟緊會成立facebook，會出袋、充電器等，喺網上售賣，收益部份會捐畀慈善。」問到點解冇佢個樣？Cally就笑話：「唔使嘞，都係卡通為主，定價都交畀人做，我好忙，自己都係以做義工為主。」而今晚Cally就會唱歌表演，唱番自己隻《堆積情感》，仲話嚟緊會推出發燒碟。
| （攝影：卓寶花） | | |
| | | |
| | | |
|
鍾意就快D Share啦！
|
|
|