陳啟泰(Ken)喺01年為亞視主持《百萬富翁》，收視曾高達39點，成功扭轉亞視頹勢，但係喺13年有傳Ken因為公開支持發免費牌而激嬲亞視，最後阿Ken雖然有心留低，但係喺唔知會唔會製作新節目嘅情況下，Ken決定外闖創新事業！(新聞連結：http://bit.ly/2hK6428)
回復自由身嘅阿Ken，除咗去咗有線主持節目之外，亦都試過北上拍戲兼唱歌，最近仲應ViuTV嘅邀請，同李蔓瑩(Renee)、英健朗(小占)一齊主持《晚吹-有病有真相》，呢個節目啱啱喺周一播映首集，已經有唔網民喺網上談論！大家都對阿Ken嘅養生之好有興趣，唔講唔知，阿Ken仲有另外一個身份，就係「陳醫師」。
噚日「陳醫師」喺柴灣接受《蘋果》訪問，講到呢個稱呼，佢話：「自從我做完《尋找隱世醫術》，開始對呢方面好有興趣，加上我喺02年受失眠困擾，嗰陣睇過好多醫生都冇用，於是乎決定自己醫，慢慢累積好多呢方面嘅經驗，所以喺節目都有個小貼士，提供一啲主流以外嘅嘢俾大家！」
唔知又有冇朋友上門求助呢？阿Ken話：「有㗎，前幾日有一個喺有線嘅同事，佢呢排瞓得好差，我提供咗啲方法俾佢，只要佢試完俾番啲feedback，等我儲埋可以話俾其他人聽。失眠呢個問題困擾咗好耐，喺呢10幾年嘅求醫經歷，真係好嬲。事緣係因為我食咗好多保健產品，傷咗個肝，我點解嬲呢？係因為我搵過好多醫生，有啲收費好貴，但係我唔介意，佢揸波子又好，幾有錢都好，最緊要係醫好我，起碼都幫到我少少，但係我發覺好多慢性病都醫唔好，好似血壓高、糖尿病，咪叫你食一世藥，但係呢啲其實可以靠運動、食療同身體排毒根治。」
咁你最後係點樣去解決失眠？阿Ken話：「我失眠最主要嘅原因，由20幾歲開始，所有麻甩仔都覺得自己唔舒服就係熱氣，於是咪去飲涼茶，我自己份人又好偏激，走去飲啲好勁嘅涼茶，結果搞到身體太虛，試過冬天虛到好似啲小女生咁怕凍，所以咪食番啲溫和同補少少嘅嘢，經過2年左右嘅調理，好幸運見到曙光，有番啲睡眠質素，起碼有4至5個鐘熟睡。」
之不過只要熟悉阿Ken嘅事，最令大家會諗到當年佢嘅「飲尿治療法」，阿Ken話：「呢個係嗰50萬個偏方之一，如果一句問我飲唔飲尿，其實只不過係好寫，陳啟泰飲尿喎，好肉酸喎，其實一啲都唔肉酸，呢個係最正統嘅主流中醫療法，只不過飲尿唔係萬能，好似醫唔好我嘅失眠，但係有好多嘢勁到不得了！」佢話：「好似我姑姐有40年風濕，要打側上樓梯先冇咁辛苦，但係佢唔使錢睇醫生，所有療法佢都試勻，但係都冇用，於是我咪叫佢試吓，過咗大半年，佢同我講話唔得喎，只係話瞓覺好咗好多，再過年幾，佢話俾我聽好番，到o依家10幾年都冇發！」
咁o依家使唔使keep住飲？佢話：「唔使好多，主要係通番啲微絲血管。」但係呢件事當日都受到好大爭議，Ken就話：「點解要爭議一啲傳統幾千年，有幾億萬人試過嘅嘢？呢個係《本草綱目》記載最正統嘅主流中醫療法，o依家啲人只係唔信嗰套，點解要話佢係偏方？呢樣我都唔係好明。」
| （攝影：陳俊強） | | |
| | | |
| | | |
| |
|
鍾意就快D Share啦！
|
|
|