現今香港樓價高企，不少年輕人都擔心將來未能上車置業，不過年僅24歲的歌手許靖韻（Angela）最近與母親購入其公司英皇集團旗下，位於長沙灣及價值500萬以下的一房單位，榮升為業主！她坦言雖然與母親這幾年都想買樓，但當日是打算齋睇樓，從沒想過會即時購入單位：「咁啱個籌好好，覺得有個好嘅機會，今次公司又包借，我哋覺得唔麻煩，又唔使拎好多錢出嚟先買，我哋都係拎咗一成出嚟。」
供樓有壓力
因事出突然，她未決定可會自住，但現時的她覺得忐忑及有壓力：「因為仲要供，一個月供一萬五左右，好似好長遠咁，但唔係超級吃力嘅，我都希望我自己供晒，始終我後生啲，可以做嘢多好多。」雖然做歌手收入不穩定，幸好她平日生活節儉，所以儲錢無難度：「我係買衫要諗幾次嗰啲人嚟，同埋我又唔會追名牌、使好多錢，係真係儲到錢嘅人。」
新歌教人唔好受物質影響
Angela最近推出講述成長的新歌《琢磨》，希望鼓勵大家無懼地呈現自己最赤裸一面：「有時可能成長過程中會令我哋冇左啲最原始、最想要嘅嘢，例如有人唔鍾意音樂，但屋企人逼佢，令佢忘記當初最想追求嘅係咩，有時社會畀嘅一啲壓力影響我哋選擇嘅路，首歌想講叫大家Be yourself！」她亦坦承因受外界影響，所以在大學揀科時是選擇修讀金融系，而非自己最喜歡的音樂：「香港環境嚟講金融係好Major嘅，我覺得有前途就揀呢科，有時會畀啲物質嘅諗法令你做咗某啲決定，但我當學多一樣技能囉，亦都冇放棄過音樂。」
自覺心態成長
而在這幾年的成長旅途上，她自覺在待人接物方面有明顯的進步，並透露自己加入公司頭兩年都不敢返公司，亦不會與同事傾偈：「我嗰時讀緊中學，嗰啲人全部都係大人，唔知點同佢哋溝通，所以嗰兩年好驚，但咁樣唔好，你身邊嘅同事係唔知你諗咩同想點，所以喺揀歌、所有嘢會同佢哋有偏差。」現時她學會主動與同事溝通，所以近兩年的作品都能切合她的想法，而她在年頭已與公司商討好今年的歌路及形象，方向非常明確，她說：「之前幾年會唔知自己想點，但今年方向好明確，除咗音樂之外，唔會諗其他嘢，都希望今年開始慢慢畀人認識到，感受到我係比較wild啲，少少rock嘅，自己都會寫多啲唔同類型嘅歌。」
|
鍾意就快D Share啦！
|
|
|