林子善同女友靜雞雞簽字結婚，好Sweet！
藝人林子善今年七月入紙排期與圈外女友kary結婚，當時仲話會喺十月初先簽字，然後去馬爾代夫影結婚相，到明年4月3日先會擺結婚酒。
今日林子善就喺社交網上載一張瞓地被女友牽住鼻窿嘅相，十分搞笑，仲留言：「20171016之上路，有傻人終成眷屬，一起踏上婚姻之路。」原來今日林子善簽字結婚，真係恭喜晒！隨後Kary亦喺社交網上載二人合照，同大家分享喜悅，佢仲留言話：「以後要相親相愛，唔好成日蝦我I LOVE U！」相當Sweet，再一次恭喜晒林生林太！
扮晒嘢唔想簽字
人逢喜事精神奕奕嘅子善，原來係啱啱拍完通宵戲沖個涼休息一陣就去註冊結婚，相當匆忙。問佢點解唔請日假，要趕成咁？佢話：「因為劇集遲咗成個月煞科，原本諗住拍套內地微電影，依家都拍唔到，冇咗幾十萬。」唔夠瞓再加上咁匆忙，宣誓時有冇蝦碌嘢先？佢話：「咁又冇，我老婆簽字好似簽卡咁快，我就特登搞氣氛，扮想簽同唔想簽之間，大家見到都笑，因為我唔想整到太感人，因為我同老婆都好易喊，唔想大家被感染一齊喊。」
問到子善計劃生B？佢話：「冇咁快，我下年四月三日擺酒，擺完先，大肚搞婚宴好辛苦㗎！（點解註冊、擺酒唔一日搞晒？）唔係我哋揀，係睇相師傅揀，佢話今年簽咗字先，今日係利我哋嘅，而擺酒就出年先好搞，咁我哋係聽師傅講嘅。」
------------------
東網巨星開咗ig喇，大家快啲follow
https://goo.gl/KGuo2N
來源 source: http://hk.on.cc
|
鍾意就快D Share啦！
|
|
|
