卡努無阻東方神起澳門登陸
劉美君尾場遭殃 心痛腰斬
颱風卡努襲港，捲走了兩個演唱會！現年52歲的劉美君昨晚紅館尾場撞正八號波，無奈在5時的「死線」來臨時，親自宣佈個唱取消並向觀眾道歉，激氣的她忍不住罵：「我要鬧佢死人天文台！」另韓國女團少女時代前成員Jessica，退團後首度襲港開騷都難逃取消命運，不過東方神起則如期在澳門演出。
劉美君前晚相隔9年再踏紅館，以十個不同造型和場景，配合演繹多首金曲。
劉美君（Prudence）相隔9年再踏紅館舉行兩場「千色」演唱會，9年前她的個唱在黑雨天氣下騷照開，昨晚尾場卻因颱風卡努襲港要取消。劉美君傍晚仍如常坐保母車到紅館預備，在facebook開直播親自報告情況：「𠵱家4點50幾分，on the way去緊紅館，因為紅館最遲9點開騷，5點要決定，紅館好麻煩，好多批文要填，想大家知我係冇放棄，希望呢幾分鐘內，死人天文台仲唔快啲降，我要鬧佢死人天文台！」
劉美君昨日在fb直播宣佈個唱取消。
劉美君化身歌女，舞姿優雅。
劉美君反串扮偵探，與女舞蹈大跳辣身舞。
Jessica見歌迷
劉美君嘆氣說：「唉！如果真係5點後降，真係好悲哀，因為真係取消，係唔會有補場，因為之後有其他artists開騷，如果真係咁唔好彩，shit！唔會即刻可以補到時間做騷，要等，唔知要等幾耐。」去到紅館踏入死線5時，劉美君親自公告取消並道歉，樂觀的她笑說：「我又未死，唔死仲有得做，起碼上天畀咗一晚我做，已經好好。」昨晚7時劉美君再開直播：「大家都諗緊點做，冇放棄呢件事，希望有最後機會。」
而為劉美君騷擔任嘉賓的林保怡在電話嘆可惜：「我一路喺屋企stand by。都啱嘅，大風大雨，如果有乜嘢意外就唔好啦。噚晚好多朋友睇完都大讚話好好睇，係Prudence嘅嘔心瀝血嚟。」劉美君所屬環球唱片則表示，將盡快公佈有關演唱會取消的安排及詳情。
除了劉美君尾場紅館騷，韓國女團少女時代前成員Jessica於昨晚假九展舉行「Jessica On Cloud Nine Live in Hong Kong」亦因八號風球取消，主辦於fb表示觀眾可獲安排退款。當Jessica得知大批港迷在會場外等候，昨晚亦有到場跟粉絲打招呼，令粉絲非常感動。
林保怡（右）前晚擔任嘉賓，跟劉美君合唱經典歌《偷窺》。
【倒吊自轉】
劉美君演唱會場景穿梭古今，由中世紀到未來2071年。
【釘十字架】
前晚演唱會劉美君換上10個造型，更要在台上換妝。
倒吊獻唱認任性
劉美君今次個唱真是一波三折，開騷前因腳傷舊患變豬蹄，又跟拍拖8年的男友Steve分手，尾場更撞正八號風球取消！幸前晚首場演出順利，劉美君換了10個穿梭古今的造型和場景，演繹多首經典金曲。
打頭陣以中世紀時期教堂做場景，着高衩裙模仿被釘十字架吊高半空唱《我估不到》和《浮花》，隨後場景轉到10年三藩市、90年香港、84年倫敦、33年芝加哥，甚至中國古代。嘉賓林保怡於60年代巴黎場景現身合唱《偷窺》。之後一幕講述未來2071年的東京，劉美君坐在半空的一個盒子舞台內，連人帶凳360度旋轉，猶如時鐘內的分秒針，倒吊唱出《我真的受傷了》，得到觀眾熱烈掌聲。去到最後一幕，劉美君重演86年處女專輯造型唱《兩杯茶》及《千色》，安歌時唱《Man In The Moon》及《我估不到》作終結。
完騷後劉美君在後台直言鍾意唱歌演戲，所以想solo演繹成件事，多謝大家成就她的任性決定，她眼紅紅說：「我唔覺辛苦，好開心50幾歲都仍然可以做到。」
採訪：曹家誠、魯吉
攝影：陳俊強
劉美君前晚完場時與眾舞蹈員謝幕。
蔡一智與太太及陳慧嫻（右）結伴捧場。
|
鍾意就快D Share啦！
|
|
|
