掃呢頁CODE去手機

2017年10月23日 星期一

人氣王:關智斌有錢冇拖拍好心酸 __,關智斌,

有錢都冇另一半,真係一個悲哀!關智斌近年專注在內地掘金,有指幾層樓揸手的他已成「億萬富豪」,對此他表示身家跟億萬仍有段距離,但有信心一定會賺到!他亦坦 ...


有錢都冇另一半,真係一個悲哀!


關智斌近年專注在內地掘金,有指幾層樓揸手的他已成「億萬富豪」,對此他表示身家跟億萬仍有段距離,但有信心一定會賺到!他亦坦言有計劃十年後到加拿大定居,因為當地樓平,而且很多親戚都住在當地,令他有意與父母一起去感受大家庭的溫暖!雖然事業得意,但感情方面他則自稱是「單身狗」,見到朋友有拖拍曾感心酸,亦自爆雖然曾與人約會過,但因工作忙碌沒時間培養感情!

藝人關智斌(Kenny)最近推出新國語歌《習慣說謊》,歌曲是網絡電影的主題曲,講述一段關係以為善意的謊言可以令大家好過,但謊言逐層疊上去時,到最後只會變成無法挽回的錯誤。他坦言之前拍拖曾試過對另一半講善意謊言:「但嗰時技巧差少少,講大話會畀人識穿,依家反而覺得直接講心裏感受好啲,發覺講嘢有好多方法,例如依家見到人做啲嘢唔順眼時,我會溫和同佢講『你下次咁樣會唔會好啲』。」自稱講嘢唔叻的他透露試過一時口快Hurt到人,他尷尬笑說:「我哋拍戲要吊威吔,着威吔衫成個人會撐大咗,有次見到個好耐冇見嘅朋友,我就攬吓佢,攬完我就話『乜你今日吊威吔咩』,佢話『冇呀,我冇着威吔衫』,即係其實佢係肥咗,我尷尬到暈。」

Plan加拿大定居家庭樂

Kenny於2003年與張致恒(Steven)以組合Boy'z身分出道,組合於2005年首次解散後他作獨立發展,2008年開始北上工作,直至2013年因劇集《追魚傳奇》而爆紅,有指過去幾年一直忙在內地掘金的他已成「億萬富豪」,除了在香港有幾個物業外,在內地及加拿大都有物業,對此他笑言此稱號太誇張:「有信心我一定會搵到,但依家仲有段距離,仲努力賺緊。(有錢會選擇買磚頭?)我會喺個適合地方,而又能力許可買層樓畀自己住得舒服,一定要落地生根。(已有心水買下一層樓?)我好想去加拿大,因為嗰度價錢真係差好遠,平好多,而且係好適合生活嘅地方。」

他表示爺爺、嫲嫲及很多親戚都住在當地,五月底曾與家人到加拿大探親,他說:「我開頭都驚好唔慣、驚悶,但嗰個星期反而覺得好溫暖開心,好耐冇試過一大個家庭,一到星期六、日係廿個人一齊燒嘢食,係久違咗嘅家庭溫暖,我以前唔鍾意加拿大,但經過呢次就有好仔細考慮,如果可以接埋阿爸阿媽一齊去嗰邊,成家人喺嗰邊都幾溫暖。(計劃幾時會咁做?)依家有呢個諗法,但呢刻唔會做住,可以Plan十年後。」

有Dating!邊個頂得順?

Kenny事業順風順水,但一講到感情,他即大呻:「唉,單身狗,真係好心酸!有時都曾經咁諗過,見到身邊朋友夜晚約咗另一半睇戲、食飯、行吓,佢哋覺得普通嘅日常生活,對我嚟講好似係好耐、遙不可及。(羨慕人哋有拍拖?)間唔時都有咁嘅感覺,但我都知我選擇咗依家呢個工作,想行嘅呢條路。」講到其公司很多師兄師姐都可以事業愛情兩得意,他即說:「佢哋嘅事業已經有所成就,可以有時間培養感情,我仲要慢慢努力向上爬。(屋企人有冇催你?)冇㗎!可能佢哋想催但唔夠膽,但佢哋唔會特別理我呢樣嘢,開心就好。」

講到條件好的他靚仔又事業有成,理應吸引不少人埋身?他坦言:「其實有Dating,冇就假嘅,但冇時間培養,3個月喺北京,3個月喺上海,邊個頂得你順?(搵番圈中人?)仲大鑊,大家唔使見可能我做嘢嗰陣佢走咗,我休息嗰陣佢又做嘢。」問到可有計劃成家立室?他苦笑說:「唉,唔好問我咁深奧嘅問題,問我下個月做咩、點研究個角色我都仲答到,但問我幾時成家立室,連對象都未有,邊夠膽諗呀?」

「可見嘅未來冇咗Boy'z!」

談到明年是Boy'z出道15年,問可會有機會合體開騷?Kenny坦言:「其實我同Steven年頭已同公司完約,我續約,佢就冇續,我都覺得有啲慚愧,冇同一班支持嘅朋友講聲道別,依家喺可見嘅未來真係冇咗Boy'z呢個組合。(好可惜?)唔緊要,大家向前看,到有合適嘅機會我哋可以去《流行經典50年》,或者15年唔重聚、但50年重聚。」

同Steven成日鬧交

講起組合之間的回憶,他坦言兩人常吵架:「我哋鬧交就梗㗎一個組合點會唔鬧交,但真係緣分,我哋咁多年,咁難得由兩個唔識嘅人無啦啦拼埋一齊,嗰3年大家見得多過見屋企人,某程度上呢個感情就算隔咗咁多年都仲會喺度,已經當咗佢係屋企人、細佬。」他記起當時兩人要兼顧唱歌及拍戲,連休息時間都沒有,由早上6點拍戲至晚上7、8點,緊接晚上錄音錄到天光,他說:「記得錄《死性不改》嗰陣係咁,我同Steven講邊個入去唱,就邊個喺出面瞓,然後大家瞓醒喺出面沖個涼,跟住又開工。」

化妝:Elaw Wong assisted by Crystal @thelook-studio.com

髮型:Keith Wong & Alan Chan @Orient 4

服裝:AMI@I.T

場地:香港九龍貝爾特酒店


來源 source: http://hk.on.cc
鍾意就快D Share啦!