林作財困碌爆卡借錢開飯
前大律師林作有個做生意的富媽媽，一向予人印象是生活無憂的闊少。向來說話爆Seed的他，昨日在社交平台突然爆林媽媽要現金周轉出售豪宅，再爆自己經濟都一樣唔掂，因為大使致碌爆卡，要網上賣名牌物品套現，更直認現在黐飲黐食，要向朋友借錢開飯。
林作不做大律師後，瓣數甚多，除做補習天王，最近又簽了范振鋒的公司進軍幕前，原本很有財路，但林作昨日卻在社交平台驚爆媽咪王莉妮遇上經濟困難，要賣樓周轉，寫道：「實不相瞞，屋企最近環境急轉直下，已經在醞釀出售所謂豪宅。」有傳該豪宅本來是林作媽媽買給林作與十優港姐麥明詩結婚之用，可惜二人分手收場。而林媽媽一向營商有道，去年以6千多萬購入麥當勞道3千呎複式豪宅自住，現時市價8千萬。
為50蚊愁爆
對於爆媽咪賣樓一事，林作直認不諱：「媽咪話生意需要錢周轉。（媽咪生意唔掂？）唔知，佢同我講要賣樓，未諗賣邊間，有其他物業，係整合吓啲物業。（之後一齊住？）係！慳得就慳，我孝順，佢話點就點，優化資產管理係好，我拍拖結婚又遙遙無期。（所以媽咪賣層樓？）唔知！佢想我結婚，但我又冇女朋友點結婚？可能佢失望收番。」他稱擔心媽咪致廢寢忘餐，愁眉深鎖，所以要努力搵錢。
點知他爆完媽咪，再爆自己亦經濟拮据，自認已碌爆卡，為了50元而愁爆，咁誇？他認真地說：「原本想買英超直播睇，之前有個優惠200幾蚊，點知碌爆卡，過咗優惠期，依家要用貴Plan，畀多50蚊，好傷心。」他續說：「依家慳得就慳，車都唔揸，要靜靜雞上網賣名牌、手錶，連飯錢都要問朋友借。一星期三晚食漢堡包，大廈保安見到我食包都話心痛。」林作認入不敷支，並列出不能剔除的花費，首位是飲食，因為酒精用來氹女仔，不能慳；第二位是訂製眼鏡，原因頭大要訂製，不能慳；第三位是供車。
「我都想入豪門！」
雖然林作認大使，卻不認自己理財不善，亦不需要債務重組，更拋書包引用英國已故前首相邱吉爾的名句：「邱吉爾曾經講過，使費係唔應該控制，但如果因為使費增加，就要增加收入。」他坦言因媽咪突然要錢周轉而嚇襯，還大膽地說：「阿媽都係靠唔住，要靠人哋，唔係得港姐想嫁入豪門，我都想入豪門。」
林作單方面爆阿媽料，身在北京的林媽媽聞言激氣說：「衰仔，成日亂噏，當佢宣傳囉！間屋裝修好鍾意，唔會賣！其實一共有三層樓，兩母子使乜住咁多間吖？豪宅冇人住，益咗個工人，建議不如將林作嗰間出租，佢落樓下同我住3,000呎呢間，我嗰度有五間房，我又成日飛，依家間屋經常淨得個工人住，林作又未結婚，咁先合乎經濟效益。（林作話自己好大使？）由佢噏，當佢宣傳。」
文：名人組
|
鍾意就快D Share啦！
|
|
|
