喺貧窮山區入面，有着無數個童婚家庭，由於缺乏教育、性知識，男孩同女孩有咗下一代，佢哋唯一只能選擇結婚，唐寧喺8月以國際培幼會大使身份，隨團前往越南探訪3位童婚女孩，此行令佢感觸良多，事後跟囝囝分享時，囝囝嘅反應更係唐寧始料未及！
唐寧表示2015年5月獲國際培幼會安排到印尼探訪，今次再獲邀到越南繼續探討童婚，唐寧話：「好多落後國家都有童婚，佢哋冇乜受過教育，或者因為傳統，所以好細個就結婚，不過生活喺山區嘅女孩子，一旦結婚，佢嘅人生就完，有個女仔叫小雁，佢讀過書，但因為屋企重男輕女，寧願將錢畀男孩子讀，其實小雁夢想係成為老師，O依家做唔到，但佢參加一個『女孩天地』，去學知識，女仔有咩權利，點樣保護自己，等佢哋可以了解下外面世界。」佢指童婚家庭嘅老公，年紀一樣好細，一樣冇能力照顧養起家庭。
回想一個16歲嘅童婚女孩，喺佢哋資料搜集嘅時候，呢位女孩當時已經懷孕，到佢哋探訪嘅時候，佢嘅BB出世3日，因為破傷風而離世，唐寧話：「我哋好震撼，冇諗過冇咗個BB，我問佢係咪好難過，但佢唔識得答，因為從來冇人關心佢，佢又唔識去表達佢嘅難過，工作人員睇到牆上有啲數字，問番原來係紀錄BB出世嗰日同離開嘅日子，佢只能寫日子去紀念個BB。」
唐寧將此行經歷，逐一分享畀女子知道：「我影咗好多相同片，不過阿女2歲幾仲細，佢未識，阿仔6歲幾，佢知道我要坐電單車入去，好危險，因為另一面係山坡，估唔到阿仔好擔心，佢好緊張，知道我當時好危險，佢有少少想喊，問大家有冇事，我都有同佢分享當地小朋友嘅生活，教佢唔係必然有，但有嘅時候就要珍惜，如果有能力就更加要幫人。」
對於今年6月唐寧宣佈同鄧偉傑離婚，自此成為單親媽媽，喺呢兩次探訪中，感受會唔會唔同咗﹖唐寧話：「我又冇喺呢方面諗，我係一個母親，無論點都係一個母親，所以感受一樣係咁深。」離婚之後，有冇更加留意自己子女嘅情緒、心態﹖佢話：「都會留意，但生活唔會有太大變轉，佢哋同爸爸都有見面，唔係完全冇咗，所以唔太大擔心。」有冇同仔女講父母現時嘅情況﹖唐寧表示：「佢哋都仲細，但佢哋係知道爸爸媽媽分開咗。」仔女知道父母要離婚，有冇喊﹖佢話：「咁又冇，阿仔好窩心，佢同我都好朋友，我哋有隻公仔，佢話佢係爸爸，我係媽媽，所以我哋喺公仔身上有個夫妻關係，近排早起身返學，我就用公仔整醒佢，佢都好生性，好明白事理，好窩心。」
離婚後，唐寧指一切都順利過渡，繼續生活，預計年底會去上海演出舞台劇，佢諗緊帶唔帶兩個小朋友去，順便一齊過聖誕節。現時做單親媽媽係咪好吃力﹖佢話：「又唔會，照顧小朋友，兩方都有，所以唔會太擔心，同埋我媽媽好幫我手，即使以前都試過唔喺香港出外工作，阿仔都好習慣。」談到好多小朋友會因為父母嘅離婚，而影響到將來對婚姻嘅睇法，唐寧話：「明白，我一路都學習緊，我會一路睇住佢哋，即使任何關係都好，最緊要係等小朋友明白到佢哋係充滿愛，佢哋就可以過渡到。」問到佢O依家有冇人追﹖唐寧笑住話：「呢個唔諗住，我個仔啱啱升小一，呢一關好重要，小朋友同家長都要適應，幼稚園生活跳去小學生活，模式好唔同，所以感情事就隨緣」
鳴謝：
服裝: mizzue
化妝: Miranda Ng
髮型: Haffman Cheng
|
鍾意就快D Share啦！
|
|
|