「石破天欣」返嚟喇！石天欣去年7月秘嫁拍拖4年、任職Marketing嘅Jacob，跟住就嫁雞隨雞去美國居住。攞到美國綠卡，有居留權，但就未係公民，仍然要坐移民監，噚日天欣終於返嚟香港探吓屋企人同朋友，仲喺ig上載由妹妹拍攝嘅新相。
天欣曾經參予過雨傘運動，又無懼被大陸封殺冇工開，堅持發聲。(相關新聞： http://bit.ly/2liEKJI )但有網民質疑「既然有黃絲光環，點解唔係共同進退？」天欣曾在fb撰文解釋：「我老公係香港人，我識佢嘅時侯都唔知佢會返美國工作，我更加冇諗過會去美國生活。我每日一個人係屋企好受咩，淨係留係屋企好好玩咩？同埋已經講咗好多次，冇得話自己係黃絲就係.......香港o依家有共同理念就要企埋一齊話畀世界知，我哋到底有咩問題，而唔係你又要話下我，我又話下你，浪費晒啲精力.....香港需要更多人去籲醒各位認為政治唔關自己事嘅人，一齊保衛我哋自己嘅家園，我哋要團結繼續加油。」
離開香港越耐，天欣似乎越掛住香港，早前仲拍咗條片叫「登陸美國一周年感受『我愛香港』」。一啲生活細節，令天欣覺得好唔慣，例如美國人唔鍾意用紙巾，餐廳叫嘢食要等等等...server過嚟先可以叫嘢食，仲有間千呎大屋，原來係用木造，令佢感覺好唔安全。」
天欣噚日接受《蘋果》電話訪問，透露噚日凌晨4點抵港，但老公未有同行，佢話﹕「今次主要返嚟見吓媽咪同親戚朋友，年幾冇見，好掛住香港嘅嘢食，希望食得晒啦，食唔晒新年返嚟再食過。」佢話自己係一個好抵得悶嘅人，試過連續6日留喺屋企冇出街，佢話﹕「因為我唔識揸車，老公要返工，但又怕我唔識坐車會走失，當我細路咁，所以一直留喺屋企，直至一次我離家出走成功，之後先多咗出街。」
雖然現在香港政治氛圍唔係太好，但天欣仍然覺得香港係最好嘅，佢話﹕「我都算係喺兩個地方生活過，住邊都好，總有好處同壞處。如果二選一，我一定揀香港，因為係我由細到大住嘅地方，我鍾意港人真實感，做嘢快直接，香港雖然細，但所有嘢都好近.....但其實我去美國居住，並唔係欣賞美國有咩好處或benefit，只係我先生係美國做嘢，而佢屋企人都係嗰邊，所以我先需要咁做。」
| 石天欣嫁雞隨雞，移居美國後，但佢還是覺得香港最好。(網絡圖片) | | |
| | | |
| | |
|
鍾意就快D Share啦！
|
|
|