即上英超刨績王：http://win.on.cc/epl
星期六英超當然好戲連場，本季出晒峰頭嘅「曼市雙雄」今日會連環出擊，先有紅魔鬼打頭陣，7點半主場大戰熱刺。曼聯近期戰績稍有回落，上場聯賽爆大冷不敵哈特斯菲爾德，今於奧脫福擺擂台迎戰強敵，領隊莫連奴決定出齊強攻武器，趁熱刺有哈利卡尼因傷缺陣，希望擸晒3分重返正軌。
跟手10點就到曼城表演，英超一哥將作客西布朗。曼城剛於英聯盃失威，對住英冠仔狼隊，都要踢足百二分鐘，最後僅靠射贏12碼過關，今仗縱然對手稍弱，領隊哥迪奧拿都唔會掉以輕心，肯定出強陣爭聯賽八連勝。大家記得黐實「英超Live」，睇吓曼市雙雄今晚可唔可以齊齊威水！
【22:15】西布朗 1:2 曼城
入波停不了，曼城費蘭甸奴遠射入網，又再反先喇！
【22:13】西布朗 1:1 曼城
轉個頭西布朗追平！巴利高波妙傳禁區頂，積洛迪古斯趁曼城門將出迎快一步建功，1:1喇！
【22:11】
大衞施華禁區內左腳抽地波，過唔到對手門將
【22:10】西布朗 0:1 曼城
西布朗10分鐘就頂唔住，費蘭甸奴妙傳左路利萊辛尼，佢控定左腳狂抽遠柱入網，話咁快曼城就領先1:0！
【22:02】
比賽開始。曼城即刻反客為主，半場壓制主隊西布朗，連左閘仲有戴爾夫都上到嚟對方半場施射，可惜斜出唔中龍
【21:40】西布朗 Vs 曼城 陣已出
曼城今仗以加比爾捷西斯正選攻堅，配以貝拿度施華、利萊辛尼、奇雲迪布尼組成強大進攻組合，西布朗要頂得住對手，一定要有超水準演出！
西布朗正選陣容
門將：1賓科士打
後衞：6莊尼伊雲斯、26希加斯、23麥奧尼
中場：2阿倫尼安、20基祖華克、8積基李華摩亞、18巴利、3基蘭基比斯
前鋒：19積洛迪古斯、9荷西朗頓
曼城正選陣容
門將：31艾達臣摩拉斯
後衞：2基爾獲加、5史東斯、30奧達文迪、18戴爾夫
中場：17奇雲迪布尼、25費蘭甸奴、21大衞施華
前鋒：20貝拿度施華、33加比爾捷西斯、19利萊辛尼
【21:22】【全場完】曼聯 1:0 熱刺
曼聯換邊後表現極有決心，福仔及盧卡古接二連三製造險象，其中福仔左路傳中，盧卡古行前一步未能撞射，已為熱刺後防敲響警號。於迪利亞里門前失機後，跟手盧卡古頭槌中柱，未能入波認真唔抵。但熱刺後防一次失誤即失波，盧卡古頭槌靚二傳，艾歷迪亞被馬迪爾成功楔位，後者門前射破洛里斯十指關，曼聯就憑呢個入波，主場小勝熱刺1:0，攞到重要3分。
【21:11】曼聯 1：0 熱刺
81分鐘曼聯入波！盧卡古頭槌二傳，艾歷迪亞失咗位畀馬迪爾，馬迪爾近門輕鬆射入！
【21:07】
79分鐘，連格右路靚斬，盧卡古禁區頂近柱中楣！
【21:05】
77分鐘，熱刺有個堅靚組織，艾歷臣嚟個超級靚傳彎入禁區，阿里入楔埋門，但就射唔中目標，曼聯唔輸有運
【21:00】
71分鐘，盧卡古殺入禁區被力壓下起腳，又畀洛里斯單刀救到
【20:59】
70分鐘，曼聯換走福仔，安東尼馬迪爾入替
【20:53】
65分鐘，曼聯路爾斯華倫西亞禁區頂狂抽，僅僅高出
【20:43】
曼聯狂攻攻勢勁入肉，米希達利恩勁射，洛里斯甩手，好彩有後衞解圍；轉個頭福仔左路出地波，盧卡古走前咗一步，未能近門抽射，曼聯開唔到紀錄唔抵
【20:18】【半場完】曼聯 0:0 熱刺
曼聯今仗派出盧卡古、福仔同米希達利恩打正選，領隊莫連奴明顯想打得較主動，一開波亦係威係勢，但卻冇乜直接威脅到洛里斯。熱刺雖然有哈利卡尼缺陣，但班波堅係弗，去到上半場中段反客為主，射門比主隊仲多，呢場波堅緊湊，換邊後大把好戲睇。
【20:13】
44分鐘，熱刺憑角球攻勢搵到着數，艾歷迪亞左腳窩利一射，但過唔到迪基亞
【20:00】
曼城後防立立亂，先有致命回傳，好彩菲爾鍾斯成功解圍，唔係肯定失波；跟手應付對手高波，迪基亞同鍾斯撞埋一舊甩咗個波，施素高一射，但就唔知射咗去邊
【19:51】
穆沙施素高超長距離遠射，畀迪基亞輕易接實
【19:44】
福仔主射罰球轟近柱勁靚，洛里斯飛身撲出底線！
【19:42】
曼聯好搶韁，打到熱刺亂亂哋，福仔、盧卡古勁活躍，頻頻於熱刺禁區內製造險象
【19:34】
大戰開波，曼聯即刻嚟料，盧卡古左路走空出靚波，福仔門口等緊，熱刺門將洛里斯飛身撲到個波，撲唔到就輸梗！
【18:45】曼聯 Vs 熱刺陣已出
曼聯今仗雖鬥強敵，不過領隊莫連奴決定派出強攻陣，盧卡古打最前，出埋拉舒福特同米希達利恩從後支援，呢個進攻三叉戟演出叫人期待。熱刺哈利卡尼缺陣，普捷天奴重用孫興民打箭頭，洛蘭迪暫列後備做秘密武器。
曼聯正選陣容
門將：1迪基亞
後衞：3艾歷拜利、12基斯史摩寧、4菲爾鍾斯
中場：25路爾斯華倫西亞、21安達靴里拉、31尼曼查馬迪、18艾舒利楊格
攻中：22米希達利恩
前鋒：9盧卡古、19拉舒福特
熱刺正選陣容
門將：1洛里斯
後衞：4艾達韋列特、15艾歷迪亞、5維頓漢
中場：24奧里亞、23基斯甸艾歷臣、29哈利雲克斯、17穆沙施素高、33賓戴維斯
前鋒：20迪利阿里、7孫興民
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|