【爆相爆片】陳凱琳（Grace）早前出錢請父母及胞弟到大阪及京都旅行。豈料上周六一行人搭廉航香港快運航空返港時，有乘客投訴她與家人毋須排隊便有特快登機及有職員帶入閘，被質疑享有特權，現場有乘客高呼「大細超」。對此Grace昨出席活動時大感無奈說：「我買咗U-Biz，可以優先check in同登機。」
雖然陳凱琳與鄭嘉穎拍拖以來經常孖住出入，但仍會做孝順女抽時間陪伴家人。日前她便與父母及胞弟到大阪及京都旅行，據悉今次酒店及機票更是Grace一手包辦，認真體貼。不過，Grace今次家庭樂尾聲時卻遇上小風波，日前讀者劉小姐向本報「爆相爆片」，指上周六（11日）下午3時許在大阪機場見到Grace一家坐香港快運航空（HK Express）返港時，毋須排隊便可特快登機，甚至有職員帶入閘，因而被其他乘客質疑享有特權。
包辦機票酒店
片段中，見到戴住黑超的Grace與弟弟一馬當先行去登機櫃枱，父母就站在後面等候。Grace與一男一女職員傾談了一會後辦理完登機手續，之後便由男職員帶領Grace一家往入閘方向，其間隱約聽到有排隊中的乘客投訴說：「因為大細超，佢VIP入閘！」而讀者劉小姐就謂：「當時我同朋友正辦理登機手續，職員突然放低我哋啲資料，幫另一位乘客嘅行李掛上priority tag（優先級標籤），職員就話搵另一個人幫我哋，叫我哋等等。我跟住望一望，原來嗰個係陳凱琳，見佢同職員傾咗一陣，搞埋手續就跟住個男職員行去入閘方向。我哋條隊係online check in，都好長龍，唔知佢係咪VIP，或買咗fast pass啦，所以唔使排隊。」劉小姐表示跟Grace同一班機返港，乘客差不多全是香港人，但就未見有人找Grace簽名或影相。
孖嘉穎去旅行
對被質疑有特權，Grace前晚在電話中否認其事，透露自己買了U-Biz（HK Express的商務旅遊計劃），她說：「唔緊要，最緊要個trip玩得開心，其他嘢唔會諗咁多。」
Grace昨日一身金色低V露背裙於尖沙嘴出席「MAAT尋找黃金比例頒獎禮」，對於有乘客質疑她享特權，Grace語帶無奈說：「我買咗U-Biz，我係排priority，唔知點解會咁，係可以優先check in同登機，好多航空公司都有。」問為何撇甩嘉穎時，她說：「今次想一家人去，同埋佢有工作，遲啲聖誕節會同佢去吓旅行，好期待，唔好送禮物，去旅行就得喇。」Grace透露會到熱帶地方，並揚言不會閃婚。
採訪：嵐山、黃曉妍
攝影：葉君海
非專利服務：付錢即可優先登機
大部份廉航包括Easyjet、樂桃航空等都設有額外付費享用優先揀位、辦理登機手續和登機服務，而陳凱琳選搭的廉航HK Express亦設有商務旅遊「U-Biz」，只需多付480元起價錢，便可享用額外寄艙行李、優先辦理登機手續和登機等服務。
而在HK Express官網中，註明U-Biz可於香港國際機場享用優先辦理登機手續和預先登機服務，但未有清楚註明其他適合使用機場，僅在條款及細則中註明「某些專屬服務並不適用於部份機場或航班提供」。
|
鍾意就快D Share啦！
|
|
|
