譚小環、林奕匡喺油塘出席職安健活動，小環之前喺小食店開工時俾蒸籠整傷手臂，留有疤痕，呼籲人工作時小心，目標係明年再開多兩間店。
有記者問到佢老公蔡強榮（Eric）係咪健康狀況係咪出咗事？小環坦承：「係呀，佢身體上都好番晒，之前患肺癌，檢查身體時發現，係一期，最初期，做咗手術，唔使化療、電療，好得七七八八，兩個星期前出院。」
小環感謝遇到個好醫生：「老公切咗右邊上下肺葉嘅一半，又將唯一壞習慣食煙戒咗，o依家健康為主，休養下。」小環話老公要多休息，店舖嘅事務一力承擔。
小環透露，之前老公發燒、傷風、感冒，喺朋友建議下去咗身體檢查，結果一照就照到出事，近呢幾個月講得最多嘅係「不幸中大幸」，小環話自己都瘦咗8至10磅，要增番肥。
老公好番，小環都有打算：「o依家想去多啲旅行，唔好咁緊張，健康第一，搵錢第二。」兩人目前有一隻兩歲貴婦狗，未有考慮生小朋友，想過多啲二人世界。
Eric目前已出院返家休息，佢日前喺facebook貼咗出院相報平安，表示現時要定期覆診，佢今日接受《蘋果》電話訪問時，仍氣若游絲話：「由9月發高燒入急證室，足足2個月。真的福大命大，不幸中之大大大幸，大步欖過，來回地獄又折返人間。」Eric話喺手術後留院休息咗7日，喺屋企又休養咗一星期，身體活動能力已經回復9成以上。
更多娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|