藝人杜汶澤早前炮轟電台DJ梁泰來在訪問中對他陰陰嘴笑住話：「等咗呢個訪問你嘅機會好耐，你知你幾少戲拍㗎啦。」且更不滿梁泰來問舊是非及錄音後沒有將訪問播出街，而今日梁泰來訪問杜汶澤的訪問終於播出，但以往梁泰來習慣發訪問內容稿給傳媒，可是今次卻寫明請自行收聽訪問內容。
阿澤自嘲少拍戲
在節目中開頭，梁泰來表示：「今日嘅嘉賓終於有戲上喇，你明唔明我咁講點解呀，杜汶澤。」杜汶澤就答：「我都唔明，邊個會明呀？（你好難有電影上嘛？呢幾年…）我真係好少拍戲㗎，即係有嘢做都算偷笑啦我哋呢啲，邊好似你咁日日都有工返呀？幾好呀，見到你戥你高興呀。」梁泰來再問他在電影中自編自導自演，為何身兼多職？杜汶澤就寸嘴說：「冇嘢撈咪撈多幾瓣囉，香港人精神，我一陣同你（做完訪問），我落去接更，我揸夜更呀依家，跟着就去便利店撈朝頭早，我咩都做埋㗎啦。」
追問舊事激嬲阿澤
最具火藥味的訪問為，梁泰來指有人覺得杜汶澤口不擇言至事業受挫，輸了很多，問杜汶澤可覺得是轉接位？杜汶澤也承認：「係囉。」梁泰來再問有傳他得罪過吳君如及杜琪峯？杜汶澤就話：「嘩，你好懷舊㗎喎你，我發覺你好鍾意問埋上一代嘅嘢！（唔係上一代，係同代？）係囉，咪係上一代囉，我呢啲嘢我唔想答喎！（吳君如對你影響事業大喇啩？）吳君如影響事業大，咁點呀？（但你唔覺得唔好㗎咩？）咁點樣唔好呀？你好似知咁樣喎！（你同君如關係點呀？）我做乜講畀你知啫？嘻嘻，我同佢關係點，做乜講畀你知啫？一定講畀你知，你當呢度差館呀？（唔係！）咪係囉，係咪冇諗過呢？你問咩佢都會答㗎喎，咁樣？」
阿澤唔覺需要慎言
梁泰來再問他如何面對事業向下滑時，杜汶澤就話：「有乜點面對，咪就係面對囉，任何嘢都係堅強咁面對，你可以選擇面對同唔面對，我覺得人生唔係向上爬就係向下滑㗎啦。（邊個時候都覺得應慎言啲，有冇人影響你？）冇喎，直到依家，我都覺得冇呢個需要喎！（太太田蕊妮勸過呢？）太太邊勸得聽㗎，我阿媽都勸唔聽啦。」問到杜汶澤在圈中到底朋友多還是敵人多？杜汶澤承認敵人多：「梗係敵人啦，唔好講圈中，呢個世界都係咁啦，任何圈子都係敵人多過朋友啦，但我四面受敵，但八面威風，所以冇乜嘢。」
阿澤唔擔心會死
再談及杜汶澤曾患上「米勒費雪症候群症」，梁泰來問是否人生最難捱的時候？他說：「唔係囉，好自在，都死喇。」談及田蕊妮講起他患病時曾講到喊，杜汶澤就話：「人都要死，有乜嘢擔心，依然都唔知咩成因，都係免疫系統病！（你好樂觀？）我不知覺得幾過癮，死得喎！（擔心離開老婆？）冇法，我始終有日會離開佢，呢啲冇辦法，生老病死早啲識，好過遲啲識，最尾都冇死到，本身有藥食，醫生話兩、三年先醫得好，可能出唔到屋企，可能要換血添，但佢不贊成咁做，我一路有打開坐嘅，打坐對免疫系統有好處，咪打多啲，之後就好番，本來醫兩、三年，醫兩、三個禮拜醫好咗啦，佢話係奇迹，我覺得杜汶澤都係奇迹。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|