歌手許廷鏗（Alfred）舉行新碟簽唱會，表示下隻碟想做快歌，笑言可以搵薛家燕一齊跳十字步。期間有歌迷叫他着多啲短袖衫及背心，他笑言都想試多些不同造型。歌迷亦向他送上幾份禮物，包括他與五月天的合照、任他填目的地的機票，以及一條「神奇之褲」三角泳褲，他見到即笑言：「肯定係我個size？」歌迷解釋送上泳褲是因為游泳可以練體力，上紅館要練好體能，希望他快些上紅館，他笑言平時都只是着開四角boxer，司儀周奕瑋搞笑叫他即刻到後台換上，他即笑言：「冇見你一排點解變咗咁？」他亦向歌迷無奈笑問：「點解你哋咁嘅？你哋嘅底線咁嘅？」之後他與歌迷玩遊戲模仿MV畫面，獲歌迷打呔、又為歌迷搽唇膏等，唱歌時他又行落台與歌迷近距離接觸。
嫌條泳褲細
受訪時問到會否着條泳褲？Alfred笑言：「估唔到佢哋會買咁細size畀我，不過都幾正嘅，轉咗公司之後，粉絲嘅突破比我更大，佢哋話想我喺紅館着，我都希望如果去到紅館，如果我着得落，身形又唔太過核突，咁就試吓。（你咁保守平時都着四角？）見到我話着背心佢哋已經尖叫就知我平時幾保守，但估唔到原來佢哋對呢方面咁有興趣，我希望自己係實力派，但原來喺佢哋心目中我係行性感路線。」問到可是計劃上紅館開show？他表示：「plan緊，同公司傾緊，但我想做咗個導聽式嘅音樂會先，一路解釋番點解做咁嘅碟，一路唱live。」
恨頒獎禮攞獎
問到之後做快歌可是想搵家燕姐跳十字步？他笑言：「唔知我依家請唔請到家燕姐呢，不過十字步我識跳嘅。（你會想跳舞？）我想有啲快歌，如果上紅館都想有唔同曲風，全部慘情歌我都想喊。」他亦開心表示歌曲《神奇之旅》剛上了電台第一位：「隻碟已經有6個冠軍，值得開心，呢半年追趕，希望頒獎禮都可以幫公司爭取獎項。（對年尾頒獎禮有信心？）希望啦，我年中開始簽，同事都好搏命幫我追成績。」
|
鍾意就快D Share啦！
|
|
|
