車婉婉公開用「Baby Led Weaning」餵食方法令囝囝啃親經過，與新手媽媽分享育兒經驗。
新手媽媽藝人車婉婉昨晚（19日）在fb分享囝囝「BBQ」被香蕉啃住喉嚨的意外，十分驚險，自己被嚇到喊。事後，她接受東網訪問時解釋用了一個叫「Baby Led Weaning」的餵食方法：「即係啲食物整熟咗，切到一條條，畀BB自己攞嚟食。平時我係整爛啲蕉畀佢食，尋日就切咗一粒畀佢揸住食。我見阿仔食嘢都幾迅速，又有幾隻牙仔，諗住畀佢試吓，點知佢啲牙好利，一咬就咬咗好大舊，跌咗落枱仔度，跟住佢用口啜入去。外國好多BB都係咁自己攞嚟食，點知佢又唔嘥嘢，跌咗又用口啜番佢上嚟。我睇住佢一啜就啜咗入去，即刻啃住，喊唔到，又呼吸唔到，我好驚呀大佬！」
婉婉坦言當時不知所措，囝囝塊面仲谷到紅晒添：「佢個口又唔知點，我將佢反轉趴喺我手臂，係咁拍佢，但我拍完佢都冇吐番出嚟。最後佢好犀利，自己搞掂，佢係自己搏命吞咗舊蕉落去，我要頒個勳章畀佢！」
7個月未Handle到
問可有打算帶囝囝睇醫生？她說：「我尋日好驚之中諗係咪要搵醫生，後尾佢冇事。我睇過好多教急救嘅片段，如果拍完唔成功，真係要即刻搵醫生。依家我講出嚟係想同各位媽咪分享，呢個經驗好恐怖，感覺好難過，希望大家引以為誡，唔好以為個仔幾大舊就當佢大個咗，其實佢都係得7個月人仔，有好多嘢未Handle（處理）到。」
搜購合適餵食儀器
婉婉直言短期內不會再用這個餵法，因為自己已經嚇到好驚：「我標晒汗，全身濕晒。尋日老公唔喺屋企，得我同個仔兩個，但我有講畀老公聽，因為紙係包唔住火。」她表示知道有個合適的嬰兒餵食儀器，會立即購買，再上載於fb與媽媽們分享。
來源 source: http://hk.on.cc
|
鍾意就快D Share啦！
|
|
|
