黃翊心痛太太：毒素好高陳存正每日洗腎
八十年代歌手黃翊當年憑一曲《黃昏戀人》爆紅，惜後來事業遇阻滯，在樂壇銷聲匿迹，轉戰經營大牌檔。今年他透過無綫節目《流行經典50年》再度人氣急升、鹹魚翻生，歌唱事業再起飛，風光背後原來他一直要照顧患有腎病的前亞視藝人太太陳存正，最近太太腎病復發，令他非常擔心。至於陳存正則表示黃翊和母親都爭着捐腎給她，但她寧願每天洗腎，都不想心愛的人捱刀！
黃翊日前在電台節目透露太太陳存正腎病復發，還因服食西藥和類固醇而出現水腫，昨日受訪時他說：「啲藥多到好似餐飯咁，好恐怖！食到個人好腫，佢本身都瘦，但最嚴重嘅時候去到160幾磅，有日一瞓醒，佢腫到好似米芝蓮公仔咁，我真係有少少唔認得。」雖然太太轉看中醫後情況一度好轉，但近幾個月又出現不適，太太更要求入院：「佢都幾忍得，但都話要入院，我聽到都騰騰哋。」太太入院後，檢查到腎的情況很壞，很多細胞都不活躍：「如果細胞死咗就救唔番，盡量希望救番醒唔活躍嘅細胞。」說到太太看私家醫生多年，黃翊表示已忘記花了多少錢：「亦都唔想計數，因為條數幾得人驚！」
飲水屙尿有問題
後來太太轉往港島區的公立醫院，醫生指腎病令她的身體難以自行排毒，毒素指數很高，更曾經超過一千，情況危險，他說：「影響到佢睇嘢都矇查查，佢好驚，我都好擔心，唔知點算好。」居於大埔的黃翊即使路途遙遠，仍堅持每天買太太喜歡的食物去探她：「唔會買濃味嘅嘢，佢亦都唔可以飲水，只可以濕吓個口，因為佢身體已經有好多水，唔係好屙到尿，得幾滴。」幸好太太洗血後情況好轉，只是到現在仍未完全退水，腳跟部位仍然嚴重，期間亦有進出醫院，但已由港島區轉到大埔的醫院：「知道要洗腎，初頭諗住仲有得救，但唔得就惟有接受。依家學緊點用同消毒，申請緊租部機擺屋企。多謝大家好有心，太太依家OK，我啱啱先同佢行完街。」他指除了使用洗腎機，亦可以每日孭住兩公升水，插喉在身上就可以四處走動，但太太身體比較虛弱，孭住兩公升水很辛苦，故決定每晚洗腎十個鐘。問到兒子是否知情？他指兒子知情，但不明白嚴重性：「佢得12歲，又見到媽咪可以走嚟走去，只係冇氣冇力咁。佢都好錫媽咪，成日都會攬住媽咪。」
「活多三十年夠皮喇」
至於陳存正受訪時透露腎病復發全因輕微感冒引起，由於兩邊腎的功能都轉差，免疫系統亦出現問題，令白血球攻擊腎臟，因此要洗腎及排期換腎。她指老公和媽媽都爭着捐腎給自己，她直言感動但卻拒絕了：「我唔想見到心愛嘅人要捱一刀或者手術後唔舒服，我寧願自己每日辛苦少少洗腎。醫生同我講，洗腎可以洗二、三十年，如果真係咁，活多二、三十年都夠皮喇！」
她形容家人是自己最大支柱，如果他們不舒服，自己會感到更加痛苦：「我明白佢哋為咗我好難過，但我想佢哋好健康咁支持我，咁打呢場仗我都覺得冇問題。除非醫生話我唔換腎就會死，咁就冇辦法。」她直言有心理準備上帝隨時會接走自己，覺得家人身體健康就已經足夠，認為全靠信仰和家人愛錫，自己才可以樂觀抗病。
文：音樂組
|
鍾意就快D Share啦！
|
|
|
