楊千嬅為演唱會剪了一頭短髮，又染了銀白色，她在慶功宴上受訪時表示會keep住這形象一段時間，下個目標想做個動作演員，她笑說：「我依家似韓國派嚟嗰啲殺手。我鍾意咗，返唔到轉頭，keep一陣先，過埋年先。」
只能食粥水
千嬅坦言捨不得演唱會完結，她更分享開騷前一件好變態的事，她說：「其實大家唔知道，我開騷前兩日，趕住綵排就求其買件三文治喺車食，因為隻手污糟，咪攞住隻叉拮件蛋治食，點知架車一耷停，支叉就插咗落喉嚨度，即時冇流血，去到location就發現有個血泡喺裏面，仲愈來愈大，喺正個吊鐘位前面，有粒綠色提子咁大，真係想死，就搵醫生用針筒同我抽，以為冇事細粒番，點知塊皮甩咗變咗咁大粒痱滋，好痛，食嘢痛、呑口水又痛，講嘢都痛，由總綵排到演出到第四場都痛，好彩捱到冇影響到唱歌，真係開埠以嚟都未試過有女歌手開騷前畀叉插親喉嚨，嗰幾日只能食粥水，真係好癲，但呢個係人生好好嘅訓練，咩都唔怕，只要專心做好一件事。」
仲要作感冒
前晚尾二一場，千嬅開始作感冒，即刻啪晒藥，好彩最終都完成晒演唱會先爛聲。聲音有點沙的她表示回家也不敢攬攬兒子Torres，因為怕傳染到兒仔，但尾場Torres亦沒有出現，因為感冒菌肆虐，所以她未有安排兒子來睇騷，她說：「佢總共睇咗三場，頭場、聖誕同倒數，佢倒數都叻仔睇到完場先走。」
唔敢挑戰更多場數
問可有想過再挑戰更多場數？千嬅表示要好多準備功夫，她說：「但我覺得咁樣差唔多，你要畀個質素人哋，夾硬得個多字，做得唔好就唔好。」今次個唱可會走tour？她笑說：「要休息吓先，其實我唔可以咁講。」千嬅坦言完騷後她就收爐，她說：「都有啲廣告要拍，但主要休息同陪吓個仔，因為成個聖誕冇陪佢，我老公好好，佢有幾日冇嚟（紅館），帶咗佢去澳門玩，又同佢去嘉年華，因為小朋友係要玩。」
千嬅在我11場演唱會中，場場都有新衫，總共有40套演唱服飾，她說：「唔計度身訂造嘅服飾，品牌贊助咗成33套，我都懷疑好貴，話之靚唔靚都着咗先。」之前有場其中一件贊助衫因為拉鏈KICK住，她坦言驚到面青，因為不知怎樣賠，她說：「我哋好戇居，又用花士令搞咗好耐，原來係KICK住入面一塊布，一抆番出嚟就拉到。」千嬅為今次演唱會搞到周身傷，見她右肩有瘀傷，左肩也勞損，每日教練都幫她做超聲波舒緩鬆筋，而腳趾骨又腫脹，每次落台換衫她都要用冰水浸腳舒緩痛楚。
唔知樂嫂有喜
談到搵余文樂做嘉賓，千嬅表示今次是第一次見樂嫂，盛傳樂嫂有喜，千嬅可有恭喜對方雙喜臨門？她說：「佢雙喜臨門咩？我唔知喎，真係㗎？（你見唔到佢大肚？）冇喎，見唔到，（阿樂有冇同你講？）冇喎。」她大讚樂仔練唱她首《MR.》已經好堅，因為首歌好難唱，有人打趣笑說聽唔出樂仔是唱她首歌，她笑說：「佢真係有心，（你唔好再push佢唱歌！）都唔知點應你哋。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|