90年代憑劇集《壹號皇庭》及《刑事偵緝檔案》系列被封為「師奶殺手」的陶大宇，近年在港產量不多，雖不時有香港電視台邀他合作，但大宇選擇返內地掘金，最近新年又臨近歲晚，大宇更是工作不斷，不停穿州過省登台，正當坐飛機「飛」到頭暈之際，竟遇上「呃錢黨」險騙財。
要求先付3千蚊人仔
事緣大宇前日在內地工作後返港，收到聲稱是其香港時裝設計師友人黃梓維（Harrison Wong）的微博私訊，表示有事需要大宇幫手，指自己身在內地而國際電話未能開通，但緊急要買機票飛往北京，着大宇幫忙致電其旅行社朋友。當時大宇不虞有詐，礙於他剛落機手提電話未能直接致電內地，於是吩咐助手致電，該旅行社人士指Harrison向來跟他買機票，但因舊數未清，要大宇先付3,000元人民幣才能買新機票，此時大宇意識到可能是騙案，即機智地嗌停助手，並親自致電Harrison，不過一時間未能聯繫上，其後兩人終取得聯絡，Harrison表示正身在巴黎公幹，因時差關係未能即時聽到大宇電話，此時大宇再登入微博發現網上這名Harrison帳號並未取得v字身份認證，並非真正的Harrison帳號，相信是騙徒的假戶口。
「精神唔夠爭啲中招」
大宇接受東網電話訪問，表示最近舟車勞頓致精神不夠險墮圈套，幸及時發現才不致損失：「對方微博私訊我開始係講天氣，又問天氣凍唔凍，好似朋友關心咁，我當時都疏忽冇望清楚個帳號係咪真，到之後助手打去佢所謂嘅旅行社朋友，對方話處理緊其他機票，轉頭先覆佢，更加似係一間真公司，直到佢話要我哋過錢，我先覺得有問題，再Check番嗰個微博頭像係冇認證嘅！呼籲大家如果有朋友要幫忙，要搵到真人直接對話，確定係對方先好轉帳，否則蝕一蚊都唔抵！（係咪第一次遇騙局？）過往我一向好小心，知道有好多騙案，只係呢排不停周圍走，又啱啱落機，精神唔夠先爭啲中招。」
設計師嬲爆：別上當
Harrison則表示已有多個好友收到騙徒訊息，圈中人暫時只得大宇一位，幸尚未有朋友真的受騙，呼籲大家不要相信騙徒，而他在Facebook發文澄清，指被人盜用微博肖像圖片再開新戶口發短訊，意圖向朋友詐騙金錢：「又有人發微信問我了，說是不是我求救！這個戶口不是我千萬別上當！已經向微博舉報了，但還沒有反應。」更留低「嬲嬲」Emoji表示憤怒。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|