歌手周慧敏（Vivian）一連四晚紅館演唱會來到第三場，由個唱總監兼好友古巨基擔任嘉賓，基仔笑說：「我發覺原來我係香港音樂史上第一個要仆到落台演出嘅總監。」逗得觀眾發笑。Vivian坦言邀基仔做嘉賓是因為她有留意基仔的巡迴騷，製作很用心非常厲害，她大讚基仔好有創意，滿腦子都是天馬行空的想法，她說：「我個騷基仔全部係出心出力，佢係為咗我停晒工作同巡演，好瞓身幫我、錫我，多謝你，我唔知點報答你。」
基仔笑言自己身分特殊，因為很少嘉賓會上台跟觀眾分享演唱會的製作，Vivian笑言：「你爆料呀！你頭先冇咁講嘅。」基仔笑說：「我梗係唔會講畀你知我講乜喇！」基仔以「靚女」稱呼Vivian，他說：「靚女為呢個演唱會出咗好多力，同埋好用心，你知唔知佢得番幾多磅？得番99磅，因為佢每日嘅排練Keep fit，佢想着啲衫靚啲，又跳舞、運動，所以佢成個人瘦晒，再加上佢前陣子有少少感冒未清晒，佢都堅持為大家帶嚟最好嘅演出。」
在製作過程中，基仔表示作為總監好犀利，由他一定要求Vivian穿宮廷服，Vivian表示考慮了很久，直至一個半月前先應承基仔，基仔得戚笑說：「我理得你點諗，我點都逼到你着㗎喇，我喺網上睇到好多人話宮廷服好靚，不過就縮咗水，咩縮水呢？佢話事業線縮咗水，我覺得好冤枉阿靚女囉。」基仔笑問Vivian怕唔怕他繼續講會尷尬，Vivian說：「我都唔驚你，睇怕你都講唔出啲咩。」
基仔笑言今次Vivian試衫時自己「好勁」，他說：「我諗我係繼倪震之外，係能夠睇見到靚女身體每一吋肌膚面積最大嗰個，我係睇得最多㗎喇。」基仔繼續爆料指Vivian試宮廷衫時侯，一般女星着晚裝、宮廷衫都會盡量露出「事業線」，他隨即扮女星們夾胸的姿勢，令觀眾發笑，他笑說：「但佢換完衫出嚟，佢唔係喎，佢捽番開佢喎。」Vivian尷尬到笑到踎地：「你講啲咁嘅嘢畀大家聽。」基仔就哈哈大笑說：「我老婆話講得㗎，我老婆係佢經理人。」基仔續笑說：「嗰啲冇嘅就死夾（胸），但佢竟然要捽番開佢，佢話：『好肉酸嘅！』我心諗你有一條事業線有幾肉酸呀，你有三條事業線我就話驚要捽啫。」
基仔愈爆愈開心，他再爆Vivian試穿鑲滿鑽石的大「V」黑色晚裝，Vivian坦言見到條裙的設計時好驚，因為她不知自己能否Carry，基仔笑說：「你唔會carry唔到，你係barbie公仔身形。」Vivian坦言咁大個女第一次着這類型的服裝，她笑說：「除咗你之外，冇人逼到我，你真係好勁，你諗吓你個氣場幾勁。」基仔說：「除咗倪震，我係第二個逼得到啫。」Vivian說：「佢一定唔會。」基仔指該晚裝有很多鑽石包住心口位置，他說：「嗰啲石嘅布陣係需要我同Kenneth（著名服裝設計師陳華國）一齊去做，個布陣我埋到去咁點樣畫落去呢？」Vivian解釋：「佢哋要喺佢身度畫啲石要鑲喺咩位置，其實我有件肉色衫喺度，但佢傻仔到話唔敢畫。」基仔笑說：「因為你要攞住支筆篤周慧敏個胸好怪，我做唔到出唔到手呀。」全場大笑。
基仔表示因為服裝的事，他要了解靚女的身形，所以當日Vivian要穿上Girdle（內衣），當她在布䈴後試着好，Kenneth就話：「基仔呀，你使唔使都入嚟睇一睇呀。」當時基仔坐在外面話：「你睇得喇，跟住傳來一把女仔聲音，梗係靚女喇，佢話：『唔係呢，基仔你都係入嚟睇吓。』」Vivian解釋：「梗係，佢好仔細，佢有少少唔啱位置嘅嘢都要改㗎，我哋係唔想做十次，所以我惟有犧牲畀你睇。」但基仔當時的反應話：「唔使喇，你睇喇，你知唔知我講完呢句後悔咗十日，我返到屋企揼心，咁大好嘅機會，有幾多人睇到周慧敏着成咁呢。」
|
鍾意就快D Share啦！
|
|
|