「生煎包王」蕭潤邦（Oscar）昨日趁着37歲生日，以「最好的生日禮物」宣佈上月成功向十年的好友江若琳（Elanne）求婚成功，今年底會拉埋天窗，他在社交網霸氣示愛：「讓她不必再當女漢子！」而「生煎包王后」江若琳前晚為男友舉辦一個驚喜生日會，昨日更飛到日本慶祝生日兼預支蜜月，二人一向喜歡小朋友，直言婚後會計劃造人。
江若琳入行以來獨自撐起半邊天，經歷與舊公司合約糾紛，為律師費要頻撲搵錢養家，頂硬上的她曾表示希望找到一個心靈伴侶。去年4月，江若琳宣佈找到了對的人，與相識十年、一直不離不棄的好「兄弟」「生煎包王」蕭潤邦公開認愛。兩人拍拖以來都有影皆雙，未有停過放閃光彈。Oscar昨日37歲生日，江若琳為男友搞驚喜派對，請來一班好友包括DJ Donald出席，Oscar當然繼續放閃，最閃一擊是他公告求婚成功，相中見到江若琳戴上訂婚鑽戒。
「讓她當我好內子」
原來上月Oscar在上海已向江若琳求婚，留待昨日宣佈是給自己的生日禮物，他在Ig貼相並留言：「我今年30＋7，今年的生日禮物非常特別，是一個壞蘋果（江若琳暱稱），一個將會永遠被寵壞的蘋果！求婚成功，蘋果I do咗。」他更向女友及家人派定心丸：「永遠用心地支持她，保護她，讓她不必再當女漢子，讓她當我好內子！」甜蜜爆燈！
目前Oscar和江若琳正在日本慶祝生日及預支蜜月，暫訂12月舉行婚禮，他昨接受訪問時霸氣的說：「婚後Elanne做唔做嘢，開心就做，最緊要唔使咁搏命，太危險唔好搞。」他又透露求婚過程：「其實求婚有安排，都識咗十年，遲咗一齊，如果早啲，就可以早啲去快樂。會搞一個可以叫晒所有我哋好想見嘅人聚吓嘅婚禮，𠵱家都搵緊地方，希望盡快可以搵到。」
驚喜求婚好夢幻
Oscar笑言求婚派對籌備了一個月，曾出現蝦碌，不小心開了電話免提，差點穿崩，他說：「要好快熄咗聲，都好驚險！」他表示婚後會計劃生小孩子：「因為我同佢都好鍾意小朋友，又鍾意人哋啲小朋友，仲鍾意咗一隻貓嘅小朋友，我哋養緊嘅『糯米糍』，係生物嘅BB都好鍾意。」
江若琳昨在Ig留言：「餘生請你指教。」她接受訪問時透露求婚當日完全被蒙在鼓裏：「好開心，佢安排晒我啲朋友飛去一個地方，包咗個場同我求婚。我好感動係咁喊，佢講笑話『唔講以為我失戀，我同你求婚，唔係飛咗你』，到𠵱家仲好夢幻。」據知蕭媽媽非常痛錫這位未來新抱。
另外，江若琳密友小肥昨在旺角出席活動，提到好友即將出嫁，他驚訝說：「佢哋公開咗咩？我之前知道咗，Elanne叫我唔好講。」眼見密友從情傷到今日甜蜜到爆，小肥還擔心江若琳太幸福會變肥走樣，他又希望兩人快點生B：「我哋07新人，佢算最飲得，如果遲啲有咗唔好飲住。」
採訪：馬建華、陳杰
|
鍾意就快D Share啦！
|
|
|
