熱爆娛樂: 余文樂老婆大肚唔玩機動遊戲 [壹週刊

2018年1月11日星期四

余文樂老婆大肚唔玩機動遊戲 [壹週刊 - 1453] __,余文樂,M1,

余文樂 honeymoon後返港，早前兩公婆現身中環嘉年華，喪玩足一晚。

探熱針

余文樂老婆大肚唔玩機動遊戲

36歲的余文樂上個月「在對的時間，遇到對的人""」，宣布「封盤」做老襯，在澳洲墨爾本迎娶年僅 29歲的台灣皮帶大王千金王棠云（ Sarah）。

《壹》仔發現新婚度完蜜月的余生余太現身中環歐陸嘉年華，兩公婆在公眾場合唔避忌又攬又拖，又嘟嘴自拍，瘋狂放閃，喪玩足一晚。大細路余文樂玩勻全場，更挑戰超刺激機動遊戲，而有餡三個多月的 Sarah就聽話齋睇唔玩！

撰文：娛樂組　攝影、攝錄：陳亦龍、楊紫　設計：盧錦輝

嘟嘴自拍,兩公婆玩 selfie，樂嫂嘟晒嘴，一副冧樣。

Sweet爆

嘉年華

興奮攬攬,掟中公仔，余文樂興奮攬實樂嫂。

晒妻狂魔

繑到實,有餡三個月的樂嫂，全晚用手袋遮肚。

一六年十二月宣布拍拖，拍拖一年即閃婚，上月五日，余文樂透過 Ig宣布婚訊，搞到一班女粉絲心碎話：「失戀的請舉手！」為保密婚訊，余文樂只請了極少數親戚朋友到墨爾本觀禮，昔日老友郭富城、沈嘉偉、 Chilam全部冇影。

事成之後余文樂將婚照開心 share，更發表「愛的宣言」：「感恩你把人生餘下日子交到我手上，我一定會把幸福帶給你，我一定會好好照顧你， I love you!」連日來余文樂時不時上載老婆近照，仲俾粉絲笑佢係晒妻狂魔。

嘟嘴自拍

婚後兩公婆留在澳洲 honey moon，叉完電返港又四出拍拖，日前兩人孖住去中環歐陸嘉年華玩足成晚，大約七點戴住黑色口罩、冷帽包到冚的余文樂，同老婆齊齊著住黑色情侶裝入場，身邊仲有大班朋友掩護，當中有男有女，有大有細。兩公婆先興奮玩 selfie， Sarah嘟晒嘴加埋 V字手勢，好冧喎！

話晒係「橫州工業」中堅分子，余文樂急不及待大顯身手，第一時間走去射籃， Sarah就拎住手機幫老公影相，連射幾 round失手，余文樂死唔忿氣，俾錢再玩過，點知一樣唔中。

余文樂挑戰全場最刺激的「 Altitude」，老婆負責拍片。

喺半空 360度 fing完一輪，余文樂行唔到直線。

贏公仔送老婆

射籃失手，余文樂冇癮轉玩掟公仔，兩公婆企埋一邊先觀察一輪，等人群散開後，吼準機會出手，今次余文樂好眼界，終於有收穫，贏到公仔後，兩公婆仲興奮攬攬，拎住戰利品的樂嫂時不時笑到四萬咁口，一臉幸福。

玩完掟公仔，一行人又走去掟汽水樽，余文樂開始掌握竅門，連中幾隻公仔，樂嫂開心到興奮大叫，其間一有途人舉機影相，余文樂好機警，發現唔對路，即刻拖實老婆閃。

上月五日，二人在墨爾本完婚。

同皮帶大王千金拍拖一年。

余文樂在 Ig發表「愛的宣言」冧老婆。

老婆嚇到叫

玩完攤位，一行人開始玩機動遊戲，余文樂挑戰全場最強離心力嘅「 Altitude」，三百六十度反轉再反轉。余文樂興奮跑去買飛，樂嫂因為大肚唔俾玩，惟有繼續做觀眾，買完飛余文樂除低囗罩冷帽，交俾樂嫂保管，起動前仲多次檢查安全帶，之後舉起 V字手勢，示意叫老婆放心。負責拍片的樂嫂見到老公三百六十度半天吊，嚇到叫埋一份，直到老公安全降落，樂嫂先鬆一口氣。

喺半空 fing完一輪，余文樂降落時都有啲呆滯，仲有少少失平衡，要老婆拖住，余文樂更在 Ig上載短片仲留言話：「頭都暈！」

兩公婆最後出擊，再玩丟波波，唔知係咪 fing到頭暈，余文樂今次又失準，無功而還，最後一行人攬住戰利品大合照，之後走人。

上週，余文樂現身千嬅尾場演唱會做特別嘉賓。

更獻唱《當我想起你》俾樂嫂。

戴晒帽同口罩，余文樂身邊仲有大班朋友做掩護。

熱愛籃球的余文樂，連玩幾次射籃都失手。

禁老婆食二手煙

老婆有餡三個月，早前余文樂喺 Ig上載老婆近照，相中的 Sarah企喺跑車旁邊，側面睇雖然有長冷衫遮住，但都見到有啲肚凸凸，當晚臨上車前，余文樂突然煙癮起，唔想老婆吸二手煙，余文樂專登行開，同保持距離先扯煙，真細心！扯完煙，兩公婆手拖手行去攞車返歸。

其實一向喜歡小朋友的余文樂，去年十月已經漏口風有結婚計劃，更講明恨做老豆。

「樂仔屋企本身都係大家庭，佢阿哥同妹妹都結晒婚，有晒小朋友，你睇佢幾錫啲外甥就知喇！」余文樂身邊人透露。