立法會議員毛孟靜嘅淺水灣道寓所，早喺8年前已被揭發涉嫌違反土地用途，拖足8年仍未還原。然而，醜聞纏身嘅佢禍不單行，喺今日(17日)嘅立法會會議上衰足三鑊，果然係衰開有條路！
律政司司長鄭若驊一上任就捲入僭建風波，令到泛民議員得到如獲至寶嘅彈藥。不過，其身不正嘅毛孟靜就因而被大翻舊帳，被踢爆其寓所涉嫌違反土地用途，將開放式車房加建成為密封單位，拖足8年仍未還原，更辯稱有向政府繳交差餉，且購入時已非車房喎。但毛孟靜嘅行為同解釋就得唔到市民信服，日前更有團體上門抗議，批評佢雙重標準，更要求佢落台。
唔知毛孟靜係咪受寓所問題所困擾，搞到喺今日嘅會議上連續衰足三鑊。首先係口頭質詢環節，運輸及房屋局局長陳帆連續負責回答四條質詢，又要處理有關提高定額罰款，不過陳帆未有忙中出錯，毛孟靜就率先出現混亂，上演惡人先告狀嘅一幕。
毛孟靜喺議員周浩鼎提出嘅大嶼山交通口頭質詢時離題萬丈，竟然就下一條質詢的題目、港珠澳大橋發問。不過講咗一陣就遭到立法會主席梁君彥警告離題，但毛孟靜當然唔認同，仲態度堅決稱同主體問題有關，最終換來強行熄咪嘅下場，認真失威。但到第三條口頭質詢時，毛孟靜就尷尷尬尬講唔好意思，又狡辯話陳帆要連續回答四條質詢，加上又一心一意以為周浩鼎嘅質詢係同港珠澳大橋有關喎，足證毛孟靜係惡人先告狀，先衰一鑊。
到咗處理政府建議提高定額罰款時，就遭議員陳克勤擺其醜聞上枱而衰第二鑊。陳克勤話要罰阻塞交通，但有頭髮邊個想做瘌痢，除非好似有啲同事屋企有車位唔泊，寧願將其變成住宅，再將車泊出街咁就要罰，仲話咁樣唔止要罰僭建，更加要罰埋違泊添，寸到毛孟靜一棟都無，真係大快人心。
至於最後一鑊就係毛孟靜提出多時嘅譴責議員何君堯動議，由10月份提出一直排喺議程當中，但因為立法會拉布，又有一地兩檢無約束力議案同修改《議事規則》，就拖到今日先開始傾。點知建制派趁有5個直選議席懸空而得到嘅分組點票優勢，提出不就毛孟靜嘅議案採取任何行動，雖然今日未能表決，但將會喺聽日(18日)繼續，預料有極大機會獲得通過而放生何君堯，所以毛孟靜今次真係一日衰足三鑊，簡直係黑氣纏身呀！
|
鍾意就快D Share啦！
|
|
|