豪語錄
人生下半場 梁詠琪
入行廿二年，梁詠琪演過近五十部電影，出過多張唱片，她上半場的人生，奉獻給銀色事業。
11年，嫁給西班牙籍老公 Sergio， 15年，誕下女兒 Sofia，唱的歌由《他喜歡的是你》、《灰姑娘》、《你救哪一位》，到去年推出的新歌《 B面第一首》，「青春過了，曲風變了，都璀璨。」
人生不是一場賽事，沒有輸或贏，只有快樂與幸福，梁詠琪的人生下半場，剛剛開始。
呢七年好多事發生
訪問當天，梁詠琪是為了宣傳賀歲電影《西遊記女兒國》，當時還未知道會成功申請到紅館開個唱的檔期。訪問完了後個多星期，開心收到 Gigi入紙成功的消息，將會在五月四、五日於紅館開《好時辰世界巡迴演唱會——香港站》，對上一次的紅館個唱，原來已是七年前的事， Gigi說：「好開心呀，隔咗七年再喺紅館度開騷，呢七年好多事發生，有咗自己家庭，做咗媽媽，好多感受想同支持咗我咁多年嘅歌迷分享。因為之前已經做咗內地同美國巡迴，所以好多跳舞部分已經熟練，今次返到香港都想跳多啲，因為上次跳完之後，排舞老師話我進步咗，覺得我成個人放鬆咗，我都開始愈嚟愈鍾意跳舞感覺，所以喺香港都想跳多啲，俾香港歌迷一個新鮮感。」 Gigi發自內心的興奮，筆者也被感染，畢竟七年前她的《梁詠琪巡迴演唱會——香港 G夜》，我也是其中一位座上客。
記得上年 Gigi在北京開騷時，女兒 Sofia上台同媽咪唱《 My Little Sofia》大受歡迎，五月的紅館騷，可會安排 Sofia再上場？她說：「嗰次佢嘅反應都好鎮定嘅，都無話嚇親，我諗而家講仲早，等帶多啲佢嚟睇我彩排，再帶吓佢上台，等佢感受吓，主要係睇佢嘅感覺，因為佢而家又大個咗，開始有自己主張，所以都要問吓佢，都會尊重佢。」西班牙籍老公 Sergio有沒有看過自己於紅館開的騷？她說：「好似真係第一次，佢嘅第一次紅館睇騷經驗梗係要留番俾我，佢老婆我啦，應該會好難忘嘅。」
變得更加大愛
一一年， Gigi嫁給西班牙籍老公 Sergio，一五年誕下愛女 Sofia，這些年來，她幾乎一年只拍一套電影，盡量會抽足夠時間陪家人，有沒有考慮生多個？「都想嘅，其實生完第一胎之後，反而有好多大 project出現，譬如最大型就係巡迴演唱會，跟住一年都拍一套戲，暫時都未有時間，可能今年考慮吓。」老公和女兒的出現，令 Gigi變為一個更加好的人，「我覺得每個喺生命出現，同我有緣分靠近嘅，例如親人、一啲好好嘅朋友，其實都令我成為一個更好嘅自己，當然最重要係我嘅家庭成員，其實佢哋嘅出現係有某程度幾大嘅改變。因為以前後生時或者單身時，可能咩嘢事都比較諗咗自己先，想去邊度玩，想做啲乜嘢，呢個工作好玩就接，但而家要諗吓，可能呢段時間要陪屋企人，個女畢業要去觀禮，開學要帶佢返學……要考慮嘅嘢已經唔再係自己一個，反而培育咗我變得更加大愛，好多嘢唔係淨係諗自己。譬如媽媽需要我照顧、家庭要照顧，覺得自己萬能咗，以前無諗過可以安排自己行程，仲安排埋其他人嘅行程，安排自己已經唔係好掂，但係而家仲要安排埋其他人，發覺原來都處理到，不過睇吓你有冇心去做嗰件事，屋企人嘅出現其實俾我好大嘅啟示。」
某個時候某部戲
近年， Gigi在電影上的角色層次很廣，《香港仔》大胸凸點的演出、《骨妹》中的詩詩，不再受到後生時的玉女形象局限，《 B面第一首》其中一句歌詞都唱出心聲，「新角色，我不要演含情脈脈」，「我覺得係機緣關係，可能以前大家睇住我成長，其實可能嗰時未啱未適合，大家亦都唔會走嚟搵我，而家可能覺得我成個人整體又成熟咗，喺電影上又更勇於去嘗試，更加打開自己，大家就覺得可能幾啱佢。」演戲上的改變，是婚後突然開竅，還是另有原因？「我都唔知道係因為咩嘢之後，咩嘢之前，其實可能係一個機緣，某一個時候某一部戲遇到某個人，機緣巧合，打開咗心胸，我覺得有時做戲係睇你有冇打開個心，做人同做戲都係一樣，打開咗個心自不然會 feel到更加多嘅情感，無論情感係好似戲內國師同養女嘅情感又好，《骨妹》又好，《香港仔》又好，就算無經歷過，可能我個人比較放開咗自己，喺掌握角色上闊度又開咗。」
十年前未必接拍
將於二月上映的賀歲電影《西遊記女兒國》，是 Gigi的另一個挑戰，戲裡每個演員都要接受特技化妝，令容貌幾乎認不出來，導演鄭保瑞曾經說過，最大犧牲是飾演國師的 Gigi，她說：「其實第一次試完妝，我覺得除咗唔認得自己之外，當然係需要啲時間去接受，因為導演話特登將我髮線移後，聽到要將髮線移後已經好驚，佢需要我額頭大啲，因為想我呈現嗰份霸氣，卒之出嚟效果係成功嘅，成個造型包括埋衫，本身好有造型，前面好似一對翼嘅裝備，其實行出嚟就已經好有殺氣。」連筆者都難以認出 Gigi， Sofia認得到嗎？「我俾張化妝後嘅相囡囡睇，問佢識唔識呢個 auntie，佢答唔識，我話呢個媽咪嚟㗎，佢之後就認得，我講咗佢就認得。」
筆者曾經認為，如果《西遊記女兒國》早十年開拍，因為戲內的造型關係， Gigi未必會接，她說：「我諗唔係因為妝嘅問題，如果呢個角色出現喺十年前，我諗自己作為演員嘅基礎，未足夠演繹呢個咁有霸氣嘅角色，又或者年紀都未能夠去掌握，今次其實導演幫咗我好多，喺點樣講對白，尤其是古裝對白，點樣能夠簡而有力咁去講對白，同埋導演風格，譬如之前拍彭浩翔嘅《香港仔》，佢係要求我生活啲，講對白唔使咁清楚，就算有啲口窒、口語化、諗一諗再講都得，但呢個角色同呢個戲種就唔允許我咁樣做，上一套《骨妹》亦唔係咁樣，我演一個好沉鬱嘅角色，完全唔外露我嘅任何霸氣，今次就完全唔係嗰樣嘢，好有挑戰性。」
與林志玲有跨性別情緣
據知戲內， Gigi會與被設計成男性打扮的林志玲有跨性別的情緣，為了保持神秘感，不可劇透太多，反而，她說演國師最難處理的是霸氣。「最難處理應該係要演一個好有霸氣、好有威嚴嘅國師，但係我嗰種霸氣、威嚴除咗因為要維護女兒國和平之外，主要因為國王係我養女，好疼錫佢，當我知道佢識咗男仔之後，同唐僧相遇之後，佢第一次接觸到男人，我就發現有啲唔妥，點都要俾啲下馬威嚇一嚇佢，話俾佢聽我哋視男人為毒物，唔可以接觸，係令到國王存亡嘅關鍵，所以就比較有威嚴，呢個覺得比較難掌握啲，因為導演都要求我嘅角色比較穩重，好有霸氣，所以同以前做過嘅角色好唔同。」聽 Gigi說，演國師的霸氣要從眼神散出來，有一雙大眼睛的她並不着數，她說：「有時啲霸氣要瞇一瞇眼咁放出嚟，反而隻眼大就散晒，我覺得呢個角色對我嚟講係幾有難度，因為以前做嘅戲多數都係寫實啲，時代感重啲，今次係一套魔幻式古裝電影，以前都未接觸過呢個戲種。其實國師就好似國王背後軍師，但同對方亦好似母女關係。」 Gigi說。
五月五日好時辰
五月五日，是筆者的生日。
上個月開始，有朋友問我會點慶祝，一直都未有想法......
現在，不用我再煩，因為上天已安排了最好的生日節目給我，朋友們，睇到這個後記，快手買定飛入場，陪我唱住《 G for Girl》、《灰姑娘》慶生
哈哈哈......
撰文：海 山
攝影：蕭敬漁
錄影：葉志明
化妝： Circle Cheung(ndnco.co)
髮型： Sam Lo@ pi4.com.hk
服裝提供： Ports 1981
場地提供： Dada bar@帝樂文娜公館
|
鍾意就快D Share啦！
|
|
|
