熱爆娛樂: 四張處男廣告　攬索模跳 cha cha　 Chok氣薛世恒：冧樣自己都驚 [壹週刊

2018年2月1日星期四

四張處男廣告　攬索模跳 cha cha　 Chok氣薛世恒：冧樣自己都驚 [壹週刊 - 1456] __,薛世恒,M1,

處男廣告，薛世恒同索模拍住上。一副情深表情，闖娛圈嘅公子交到戲喎！

探熱針

四張處男廣告　攬索模跳 cha cha　 Chok氣薛世恒：冧樣自己都驚

身家逾十億的 Neway大少薛世恒，去年中以四十歲高齡殺入娛圈，遲起步惟有狂發力。孭住 Neway大少同陳法拉前夫身份，呢位四張新人有價有市，拍完內地追女真人騷，日前他亦處男下海，接拍美容院廣告。對住鏡頭攬索模一時扮 chok，一時要玩陽光味，薛公子施展渾身解數！

怕開放自己

棄商投藝壇，四十歲的薛世恒唔介意放下闊少身段，由低做起。去年中為取經，在老友蔡少芬夫婦主演的內地片《十噸刺客》做閒角，繼而拍內地真人騷。密密接 job，近日接拍廣告，處男作 chok住上陣，又要臨場跳 part cha cha做型男，壓軸重頭戲是對住索模扮深情，公子底的薛世恒信心十足，交晒功課。

對於自己處男廣告表現，薛世恒話最難拿捏是要開放自己。「因為唔慣，又有啲怕醜，又唔知自己有呢一面，突然要我做個好冧嘅表情，我自己都有啲驚。」薛世恒說。

四張咁跳脫，薛公子為做好呢份工真係豁出去。

形象指導 Arthur幫薛公子撇甩 chok味，教他跳 cha cha擺甫士，幕前經驗淺的薛公子卻一教即開竅。

永遠一副 cool樣嘅佢，喺廣告要變陽光中佬，交到功課。

chok樣難拿捏

「孖生細佬」袁偉豪事前有冇過兩招給你？薛世恒說：「好多朋友都好真誠咁俾意見我，對住鏡頭有時要我 chok啲，有時又會話唔好咁 chok，都多謝佢哋願意教我。今次拍廣告唔係好緊張，導演叫我拍出唔同嘅 feel，平時我都鍾意懶係 cool樣，唔知點解自己可以做到開心一面，原來我又得㗎喎！好似剛才臨場跳舞，我唔驚，當大家隱形，當自己喺沖涼房跳舞。」

四十歲的他，自覺終於搵啱條路。「我好享受做呢行，同做生意完全相反，從商咁多年，依家可以做唔同嘅嘢，其實係好開心，更貼近我性格。」

「孖生細佬」袁偉豪不時提點，教佢如何 chok得恰到好處。

孭住 Neway大少同陳法拉前夫身份，入娛圈點都有啲壓力嘅薛世恒，努力進修演藝課程，對呢行好認真。

薛公子：現實嘅我係追唔到女

去年底，薛世恒與賭王四房公子何猷君，以香港闊少代表殺上內地拍追女真人騷《愛的時差》，節目中雖冇後生組的猷君調皮，但他使出滑雪場打邊爐的追女必殺技亦唔弱。

節目近日出街，薛世恒話睇番，都不相信自己追女咁勁。「我自己本身唔係咁，不過否認都冇用，已經拍晒出嚟！剪接令我原本唔係好識追女仔，變到好掂。現實中我好保留，未肯定同呢個女仔可以好長遠，我係唔夠膽行多步，唔想嘥大家時間，我會認真考慮好多嘢，所以好多時都卻步，追唔到女。」