船王包玉剛有四千金，結果由二女婿吳光正（左）接掌會德豐及九倉，直至近年退下來，交由包玉剛外孫吳宗權（右）接棒。吳光正手頭的大部分會德豐股票，都是由信託基金（ HSBC Trustee）持有。
中環人語
富豪防女婿
大部分香港富豪，依然傳統，重男輕女。有仔嘅家族事業梗係傳俾長子，無仔得女嘅又點呢？
由於佢哋對女婿都信唔過，通常做法就係成立 trust（信託），生前已經將資產分配好，好似太公分豬肉，世世代代按章程行事。有啲就講到明女婿或者女兒嘅男朋友，都不能夠在家族公司工作，以免借機上下其手，損害公司利益。不過小宗聽過有一招仲絕，有位富豪連自己的幾個女兒都信唔過，索性全部都不能在公司工作，要她們在外打工或科水給她們搞小生意，家族本業就另外聘請專業團隊打理。其實咁都係好事，有能者居之，總好過富不過三代！
太古大班有計
近月喺中環鴨巴甸街 28號新盤 Aberdeen St.，賣到火紅火綠，實用面積四百多呎，售價講緊千七萬，即係平均每呎四萬元，但都有買家一批批咁掃貨。
個盤由太古地產前主席簡基富（ Keith Kerr）發展，呢位大班認真巴閉，退任後竟然自己做埋發展商起樓。佢○九年退出工作咗三十五年嘅太古，成立自家品牌 The Development Studio，密密收樓重建。去年二月，佢以 1.56億元，買入灣仔堅尼地道 33號舊樓，全幢五層共五千多呎，相信重建後再賺多一筆。按而家市況，佢賣十個八個幾百呎單位，地皮價已回本，其他淨袋！根據查冊，物業原業主叫 Irene Ngan，亦即係中巴（ 26）而家話事人、「大家姐」顏潔齡私人持有。中巴同太古過去有好多合作，包括北角港運城、港濤軒、西灣河逸濤灣，以及被對沖基金炮轟，以超筍價與合作夥伴共同發展柴灣車廠地皮。「大家姐」在公在私，對太古情有獨鍾，似乎都好明顯咯！
海航另類籌旗
一直被指有王岐山做靠山嘅海航，喺十九大過後開始見真章。個「真章」就係開始水緊。最新撲水玩法，市場指係將兩幅啟德地皮放入一個基金，再搵投資者向基金投入資金，入場費一百萬美金，年度回報達 9厘，仲可以攤分四成利潤。樓市風險可大可小，呢種「眾籌」，同喺 startup界聞名嘅「港產咖啡機」，又有咩分別？
早喺月初，已經屢傳海航資金短缺，雖然海航獲八大國有及商業銀行「口頭」支持，但其他內地私人銀行，卻避免購買其短期債務，迫使海航要提高價格，及要引入銀行擔保。據知，內地銀行如招商及民生，因為政治及經濟風險而不敢購買海航債券。今年三月中共將舉行兩會，有傳言王岐山是國家副主席的熱門人選。海航能否捱得過嚴冬、在春天翻生，政商界都食花生中。 A
撰文:宗菁華
|
鍾意就快D Share啦！
|
|
|
