睇全場入球：http://bit.ly/2DTanTi
哈利卡尼行快兩步，搵到着數整死曼聯？周三深夜英超大戰，紅魔鬼作客熱刺，開波11秒就畀基斯甸艾歷臣射爆大門。睇番慢鏡，熱刺於開波前哈神已經走入曼聯場區，如果球證見到，呢個英超史上第二快入波就冇可能出現。但熱刺今仗演出實在完勝紅魔，最終加埋菲爾鍾斯擺老烏，全場贏2:0極具說服力。曼聯全失3分，僅領先第3、4位車路士及利物浦3分。
今仗係阿歷斯山齊士曼聯英超處子登場，但一開波熱刺就入波，當時後場大腳斬前，哈神壓倒菲爾鍾斯二傳入禁區，迪利阿里射門被閂，造就艾歷臣門前建功，主隊於開賽11秒就火速領先。但原來於開波之前，哈神已偷雞跑入對手場區，令呢個入球惹來爭議。熱刺開紀錄後，成班波踢得好醒神，24分鐘哈利卡尼禁區內抽射，過唔到迪基亞。28分鐘，熱刺查比亞右路出急勁地波，菲爾鍾斯欲解圍，但就抽咗個波入網，誤擺烏龍助熱刺贏到2:0。曼聯被壓到抖唔到氣，之後仲有路爾斯華倫西亞，於禁區內較剪腳夾跌迪利亞里，球證冇吹12碼，唔係曼聯半場可能唔只失2球。
換邊後4分鐘，孫興民禁區一抽，僅僅柱邊出界。全場都冇表現嘅A山，之後於禁區內一頂，個波打中孫興民隻手，但球證冇吹12碼。曼聯跟手有盧卡古殺入禁區窄位抽近柱，但過唔到洛里斯。
曼聯之後換入費蘭尼、桑馬達及安達靴里拉，但始終谷唔起，熱刺反而更有機會入波拉開比數，可惜艾歷臣、孫興民都未能把握，最終熱刺贏2:0完場全取3分，積48分緊守第5位，差利物浦及車路士2分。1月曼聯於英超及英足盃連贏5場，但一到2月就輸波收場。
Go Go 開波 GOAL DX 策略手遊
贏盡100萬現金獎賞：https://goo.gl/irtKhK
即上英超刨績王：http://win.on.cc/epl
東網體育FB同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|
