掃呢頁CODE去手機

2018年2月1日 星期四

兩個視帝一齊走頂唔順 TVB人工低陳豪面對現實返大陸拍劇養家 [壹週刊 - 1456] __,大陸,TVB,陳豪,中國,M1,

陳茵媺主力照顧小朋友,搵錢養家的重任靠晒陳豪。娛頭兩個視帝一齊走頂唔順TVB人工低陳豪面對現實返大陸拍劇養家上月舉行的《萬千星輝頒獎典禮2017》,汪 ...






陳茵媺主力照顧小朋友,搵錢養家的重任靠晒陳豪。

娛頭

兩個視帝一齊走頂唔順 TVB人工低陳豪面對現實返大陸拍劇養家

上月舉行的《萬千星輝頒獎典禮 2017》,汪阿姐代台前幕後發聲,發表「山頭文化論」,引起極大回響。的確,休息時間「少啲啲」、人工「差啲啲」是一班藝人當下面對的最大問題,尤其是有家室的一群,想搵多個錢之餘又渴望有多點時間陪屋企人,即使大台近年積極開拓同國內合作的合拍劇,但機會全數預留給離巢的外援,令留守大台的一線藝人大感無癮。

踏入一八年 TVB兩大視帝陳豪同郭晉安帶頭離巢,結束同大台十七年及二十年的賓主關係。至於在今屆頒獎禮失落視帝,只得「最受歡迎男主角」的馬國明,密謀步兩人後塵離巢,大台新一輪的逃亡潮一觸即發。







星期日陳豪一家五口帶埋外傭姐姐到演藝學院睇兒童話劇。





郭晉安轉投靠王祖藍,同陳豪一樣,一家四口的重擔由郭晉安一力承擔。





王祖藍國內人脈四通八達,連效忠無綫三十年的郭晉安都決定離巢跟對方北上搏一鋪。

逃亡潮

上月中《萬千星輝頒獎禮》結束後,全台藝人被迫「罰留堂」聽殼王陳國強、杜之克及樂易玲訓話。「 TVB嚟緊同邵氏會開拍好多部大製作,俾我哋台前幕後嘅工作人員有多啲演出機會""王晶同公司亦會有好多部大卡士嘅製作,好似袁偉豪、蔡思貝同朱晨麗都有份參演我哋嘅大製作。」樂大媽說。

忽然穩定軍心,全因新一輪的逃亡潮已暗暗開始,而且走嘅全部都係一線,據知視帝兼 TVB一哥陳豪即將約滿,公司亦都多次搵陳豪傾續約,可惜 TVB出手低,加上陳豪唔埋堆無屬於任何一個「山頭」,近年所拍的劇集都是利用他帶起一班新人,而且開始要他演奸角,搞到陳豪愈做愈無癮。

其實陳豪早在一三年已經密謀外闖,撞啱當年陳茵媺意外懷孕,趕住要結婚生仔,想老婆婚後可以專心湊 B,陳豪被迫要續約用來交換陳茵媺可以停工唔使拍劇的條件。但係陳豪三年抱三,再生 B時廣告商對他新鮮感已大減,加上原本的經理人離開公司,而接手的經理人又接少好多工作,搵錢量比之前差一截,所以 TVB今次傾續約時,出手比上次手緊。

一家五口靠晒陳豪,加上終於開竅,明白北上搵「人仔」的重要性,眼見公司同國內合作的合拍劇往往高人工益晒離巢外援,做到無癮的陳豪,已經落實約滿後就結束同無綫十七年的賓主關係,同老婆陳茵媺一樣改簽昔日合作無間的前大台經理人嘉莉。

所以近半年陳豪突然好積極,開始使用社交平台,幫自己增加更多曝光機會,為離開 TVB鋪路。三月陳豪更會首度接拍大陸劇,要離開香港三個月,同老婆及三個仔女分隔兩地,對一向顧家的陳豪,為了賺錢養家,今次真係好大犧牲。





合拍劇《再創世紀》,林文龍、周麗淇,以至離巢不久的楊怡都是以外援身份高價接拍,唯獨郭晉安是無綫人,跟合約收片酬,相差一大截。





有現貨唔揀走去揀剛拆箱的西蘭花,陳豪果然係超市老手。





上糧前陳豪去電器鋪買碎肉機。





自覺以往太低調的陳豪,近日頻頻玩 IG報告近況。





三月將北上拍劇的陳豪,趁住空檔做住家男,連紙巾都買埋,一腳踢。





拍完《誇世代》,陳豪暫時都未再有被安排拍 TVB劇。





台慶頒獎禮阿姐發表「山頭論」,引起坊間極大回響。





食住《誇世代》餘威,陳豪都有唔少賺錢活動,但比起之前密集式日日見,算係少咗好多。





陳豪離巢後簽約昔日合作無間的經理人嘉莉,成為旗下藝人。





一三年已想離巢外闖的陳豪,因為陳茵媺忽然有喜,焗住同大台續約三年。

痴漢

爸爸







陳豪幫小朋友影相留念,外傭姐姐就負責召喚三兄妹望鏡頭。





準備排隊入場,陳豪又啜,難得 Camilla無嫌棄爸爸鬚根㓤肉。





孻女拉心肝,陳豪一手抱住 Camilla,一面出力肉緊啜。

住家男

三月先北上拍劇的陳豪,近日全職做住家男,上週六(一月二十七日)單拖到大埔超級城上糧,紙巾、食物買到一手都係先捨得走人。翌日(二十八日)無換過衫,陳豪載住一家五口同外傭姐姐到灣仔演藝學院睇英文兒童話劇《 Ugly Duckling》。他們甫進會場,即引起一陣哄動,不少家長舉機偷拍,但陳豪一於少理,繼續安排 Aimee同三個仔女到話劇背景板影相留念。完騷後陳豪抱住寶貝女( Camilla),為家人開路離開。

至於同樣又是一家大細靠晒佢的郭晉安,將會比陳豪更先一步離開 TVB,由於大台不會積極為他開拓北上掘金的機會,眼見「老表」王祖藍大陸撈得掂,所以決定轉投王祖藍旗下經理人公司,即使對方同鄧萃雯、黎瑞恩都是分手收場,亦決定膽搏膽一試。

「安仔覺得祖藍喺國內有一定人脈,大家又啱傾,反正留喺大台都無肉食,不如出去闖吓可能仲有一線生機。同埋之前拍《再創世紀》嗰陣,見到楊怡同周麗淇都收外援高價,自己就仲係計騷錢,覺得好唔抵,繼續留喺度都冇着數。」郭晉安身邊人說。

雖然郭晉安決定離巢,但 TVB已經再無號召力同有收視保證大星,所以就算即將約滿, TVB都仲要繼續搵郭晉安拍劇,今個月他會同馬國明及唐詩詠拍合拍劇《白色強人》,所以續唔續約同有冇得拍劇已沒有關係。





馬明憑《降魔的》提名視帝,有指他嫌續約年期太長,不肯動筆,甚至有機會步陳豪後塵離巢走人。





已離巢的吳卓羲、黃宗澤同吳岱融以外援身份接拍《飛虎極戰》,片酬同昔日在大台的日子差天共地。

無限加簽應對

逃亡潮一浪接一浪,大台方面一早已有相應對策——提早傾續約之餘,亦將續約期由以往的二、三年加至六年起跳。李佳芯、陳展鵬、高海寧等一早已被大台要求加簽慎防被利誘撬走。當中最誇張的不得不提張振朗,據知他加簽長達十二年,同大台完成合約時已是四十二歲的中佬。

難怪憑住《降魔的》有份提名今屆視帝的馬國明遲遲未肯動筆同大台續約。「馬明今個月中就四十三歲,續簽至少六、七年,完約咪成五十歲,仲點出去撈?一向講到明恨錢唔恨獎嘅馬明,都會疊埋心水返大陸搵錢。」知情者說。

大台一線幾乎走清,電視來來去去只得煎 Pang、袁偉豪、王浩信,悶死人咩! A





冇簽 TVB的胡杏兒有幸同何潤東合作國產劇《那年花開月正圓》,身價即時翻幾番。





加簽愈嚟愈長,張振朗的長命約要十二年後,即四十二歲時才完結。





稍後將會返國內拍劇的陳豪,問起有關同 TVB的經理人合約,表現尷尬,表示暫時未有消息透露。

一線全走

大台一線小生花旦買少見少,個個約滿速逃,北上搵人仔,無綫無晒人,為救收視,不時以天價力邀一眾視帝視后回巢以部頭合約拍劇。





鄭嘉穎 16年 12月,拍完最後一套無綫劇《迷》後,正式約滿,與 TVB結束 15年賓主關係,鄭嘉穎北上發展,狂吸人仔,又穿州過省巡演音樂劇。





吳卓羲在無綫打拼 15年的吳卓羲, 15年拍畢台慶劇《梟雄》後,因未獲無綫重用,決心約滿走人,轉移內地市場,去年以自由身,參與無綫劇《飛虎極戰》。





胡杏兒 15年,胡杏兒與 TVB結束 16年賓主關係,其後北上拍大陸劇,去年播出的《領養》及《那年花開月正圓》大獲好評。





佘詩曼 11年曾經離巢的佘詩曼, 13年尾回歸娘家,憑《使徒行者》勇奪視后,去年 5月突然宣布再次離巢,自立門戶開「佘詩曼工作室」,又於內地狂賺人仔。





楊怡為無綫效力 17年的楊怡, 16年拍完《末代御醫》後約滿離開 TVB,去年受無綫以外邀方式回巢拍攝《再創世紀》,開價五萬一集。





林峯在無綫十五年的林峯,一直獲無綫力捧, 14年,失意視帝決意劈炮離開無綫,全身轉投英皇,更傳被封殺,三年來絕跡大台,無綫未有派員採訪林峯任何活動。





鍾嘉欣上月合約剛完結的鍾嘉欣,早在半年前樂易玲已經成日找她傾約,但 Linda忙於抽女,加上老公下旨,續約更加無得傾。

簽長命約

無綫花旦小生凋零,為箍名氣藝人,無綫出最老土招數,未約滿已傾約,以約換獎換曝光,不少藝人中招簽下長命約。





張振朗模仿張智霖而人氣急升的張振朗,近年受曾勵珍賞識,有不少演出,去年更與視帝王浩信於《踩過界》有不少對手戲,去年,與無綫簽下 12年合約,望升呢一線小生,盡得無綫歡心。





李佳芯 12年從有線轉投無綫後,李佳芯一直受重用,加上余詠珊點名力捧,李佳芯由主持變女一,去年更於《星和頒獎禮》爆冷封后,李佳芯惟有就範,續約 5年。





陳展鵬曾揚言賣身 TVB的陳展鵬,一向恨獎恨到發燒,今年失落視帝,陳展鵬惟有聽聽話話,主動無條件與無綫續約 6年。





蔡思貝入行短短四年的蔡思貝,深得無綫歡心,一劇接一劇,套套擔正,與無綫簽下 8年長約,等機會升呢攞視后。





高海寧去年自爆已與 TVB續約,合約長達 8年,高海寧更表示為咗層樓要孭 30年長債。

撰文、攝影:娛樂組 


鍾意就快D Share啦!