忙住拍網劇的張繼聰，抽空同謝安琪拍拖睇戲，過二人世界。
娛頭
煉成絕世好老公流感論惹禍衝住幫謝安琪擋駕張繼聰：對住老婆要認低威
早前謝安琪於私人群組發表對流感疫苗成疑的留言意外流出，引起醫學界猛烈抨擊。事後阿 Kay無龜縮，第一時間於 Fb確認留言是自己，順勢澄清無意影響大眾對流感疫苗的睇法，而向來是排解「關公災難」能手的張繼聰亦馬上配合轉發，還第一時間撲出來幫老婆拆彈。
過往阿 Kay有多次中伏的記錄，每次成為觀眾、網友的攻擊目標時，張繼聰總是九秒九護駕，有本事四兩撥千斤，化解危機，為老婆挽回不少面子。眨吓眼張氏伉儷已經結婚十一年，張繼聰努力維持二人的拍拖感覺，又積極奉行「老婆永遠是對的」的法則，將大家的磨擦減至最低，即使身價翻兩番，工作無停手下，依然做到對阿 Kay的呵護沒半點減退，難怪張繼聰被封為新一代絕世好老公！
第一個護駕
謝安琪的「流感論」質疑相關疫苗效用極低，又存在一定風險，醫學界即時有反應，指阿 Kay的講法無知又荒唐，作為另一半的張繼聰無左閃右避，大方力撐老婆的睇法純屬私人見解，絕非呼籲停止打針，笑稱：「唔係專業就唔講得，個世界會好悶啫！」
其實早在去年底，阿 Kay忙住湊出世只有六個月的細女張靖，遲遲未修身，惹來網友惡意批評：「肥到唔認得佢！」張繼聰秒速 po文：「女士們生完 BB，最緊要調理身體，根本唔需要介意身形……我老婆係唔會變番以前咁，而係會比以前更健康，更 fit（更靚我就唔敢講啦，因為喺我心目中已經好盡（靚）」，簡短數百字， KO網友，又大方得體，獲網友留言激讚他是好老公真男人。
愛妻有法
謝安琪事隔十年停工生女，正值張繼聰事業起飛，電視、電影疊住開，但張繼聰寧願犧牲自己的休息時間，都堅持每日陪老婆散步式 shopping，任對方選擇。曾經陪大肚 Kay shopping期間，被傳媒影到在鞋店親自為對方換鞋，惹來網友爆 like勁讚他體貼窩心。
張繼聰來自大家庭，又極愛小朋友，曾經有想過步陳豪後塵做多仔公，但自從阿 Kay第二次佗 B期間不時出現狀況，他馬上打消念頭說：「其實我好鍾意小朋友，但始終生小朋友對女士嚟講要付出好多嘢，尤其今次睇住太太再度懷孕，見佢咁辛苦，所以兩個夠晒！」
眨吓眼同謝安琪已經走過「七年之癢」，度過第十個年頭，兩人經歷了不少風雨， keep住恩愛，當中做老公的張繼聰花了不少心思去經營，他曾經講過，同阿 Kay好努力 keep住拍拖嗰份感覺，令感情歷久常新，時間過得特別容易，另外他積極奉行老婆永遠是對的之道，將兩個人之間的磨擦減到最低。「如果有一邊永遠覺得自己錯晒，就邊會有磨擦先？做老公得一個道理，係咪你錯都要第一時間講對唔住，愈快講（對不起）件事愈快過去。」
曾經有一段時間，謝安琪與陳奕迅玩得好埋，有背夫偷食之嫌，面對娛樂圈的誘惑處處，張繼聰好霸氣咁話：「如果你同另一半嘅關係好好，自然唔會有空間可以容納到其他人。」
醒水
日前忙住為網劇《向西聞記》趕工的張繼聰，抽空同謝安琪到圓方睇戲過二人世界，兩人埋位買飛期間，眼利到有記者，主動揮手打招呼，素顏的 Kay下意識閃避鏡頭，張繼聰好快 get到老婆「無面」見人，馬上扶實對方，行前兩步做人肉擋箭牌。買完飛，兩人走到附近買咖啡，見記者 keep住影，張繼聰就溫馨提示話：「都影得七七八八」
當日謝安琪事業開始起飛之際，忽然大肚生 B，撞啱張繼聰事業無起色，家人十多口靠晒阿 Kay養起，自始「廢柴老公」同男方畫上等號，兩人壓力之大令他們患上抑鬱症，走過困局，又跳過阿 Kay同陳奕迅「玩得好埋」的日子，夾啱事業開始有起色，張繼聰的絕世好老公形象亦開始成形！
力撐老婆
一向護妻心切的張繼聰，多年來每逢謝安琪受網民抨擊，必定不惜一切，貼文力撐。
抑鬱撐妻攞獎
去年 11月，張繼聰在 Fb感性發長文，貼出老婆謝安琪在 09年頒獎禮獲女歌手截圖，並自爆當年與 Kay齊患抑鬱症，形容當時在鏡頭前表現輕鬆，但生理及心理皆異常辛苦，並力撐 Kay拎叱咤女歌手銀獎。
被嘲暴肥
去年，謝安琪為張繼聰誕下細女張靖後，全面停工照顧子女，卻被網民嘲笑身形暴脹，被質疑整容，張繼聰即發文力撐兼感激老婆對家庭付出，並寫道：「香港有言論自由，可惜未必每位朋友都有尊重別人的修養……」撐老婆向網民開火。
十一年經歷
張繼聰與謝安琪結婚十一年，充斥着不少負面新聞，由「廢柴老公」到患抑鬱症，二人經歷無數。
廿四孝老公
圈中有不少男星出名「愛妻號」，好男人形象入晒屋，人前人後都錫老婆錫到燶。
撰文：娛樂組 攝影：余一駱
|
鍾意就快D Share啦！
|
|
|
