【閃耀人生女人生 袁詠儀系列之8 態度惹禍】
現年46歲的袁詠儀（靚靚）兩奪金像影后，當年紅得太快的她傳態度囂寸，連環辣㷫影壇兩大巨星，與成龍結怨被下封殺令斷交，更因為得罪了周星馳，兩人至今23年來未曾合作！靚靚親口剖析所有疑團，解開謎底，更披露跟江湖大佬向華勝的兄妹情。
採訪：陳月媚
場地提供：好酒好蔡
化妝：Kerry Wong
髮型：Sam Pan of Muse Hair
開口要求星爺萬歲
於94年跟周星馳拍電影《國產凌凌漆》後，有傳靚靚大言不慚指跟星爺風格不同，最好不再合作。靚靚呼冤：「我邊有咁夠薑呀！我儍箒，我未咁蠢㗎下話，我要澄清我係儍箒，唔係蠢！我一定唔會對有經驗嘅人講啲咁嘅說話，我自己係一個新人。」
靚靚強調跟星爺合作幾開心，自己更成功令星爺「萬歲」，她說：「佢哋話星爺未試過萬歲嘅，有個美術指導生日，我話『喂！星爺萬歲』佢真係現兜兜攞咗二千出嚟，如果大家合作得唔愉快，根本唔會有呢啲事。啲人成日話你同星爺點，我真係諗極都諗唔明，究竟係啲乜嘢不和！」
然而，兩人事實上已有23年沒再合作，靚靚淡然說：「我有聽過呢樣嘢，因為我嗰時拍《金枝2》，所以就冇咗一個機會，當然我亦都唔會去find out係咪咁樣。」
「想成龍健康快樂」
有傳95年靚靚拍《霹靂火》後得罪成龍（大哥），拒聽大哥要求補錄對白的電話，令大哥一怒之下落封殺令，兩人斷交22年。靚靚說：「前排我去問大哥，我係咪得罪咗佢呢？因為啲人同我講過大哥成日話『提起呢個人（靚靚）佢都嬲！』我都40歲啦，我諗大哥都唔細，我唔想大哥到咗某個年紀，提起一個人仲會嬲，即係佛學千祈唔好對人起怨恨心，我想佢身體健康快快樂樂。」
問到現有否人令靚靚懷怨恨心？她坦言：「梗係有，但我選擇唔會憎一個人，我反而漠視佢。老公曾經同我講過，多一個朋友好過多一個小人，所以我𠵱家會假囉對佢，唔好再俾佢插多刀囉。」
|
鍾意就快D Share啦！
|
|
|
