梅姐邀約後悔冇到
梅艷芳是靚靚的偶像，可惜兩人只合作過《金枝玉葉2》，靚靚說：「我覺得梅姐好孤獨，真正了解佢心入面嘅，可能得一、兩個朋友，我覺得遺憾就係，我冇用一個好好嘅機會去做佢嘅真心朋友，嗰時梅姐都有約我食飯，但我都用工作忙嘅理由去推佢，如果𠵱家畀我重新揀，我一定會去食飯，自己後悔冇去做呢一步。」
靚靚在梅姐身上學懂專業態度，她說：「梅姐身體唔係真係咁好，我覺得佢內裏係一個好溫柔、好弱嘅女人，但每次出嚟就係女強人，特別站喺台度就成個女神，佢拍戲嘅時候病到死死吓，一換戲服就好似飲咗十打寶礦力。」
張國榮提點入耳忘
袁詠儀和張國榮曾合作過《金枝玉葉》及《金玉滿堂》等電影，雖然靚靚是兩屆影后，但哥哥卻是天王巨星，連影后都冇面畀話鬧就鬧：「嗰陣時我連瞓覺嘅時間都冇，可能真係會有啲飄飄然，覺得自己好紅呀，喺片場唔會有人夠膽喝你，但哥哥嗰時唔係㗎，『喂袁詠儀！過嚟，做乜呀？𠵱家好紅呀！』我見到個人會驚嘅，我諗哥哥係其中一個囉。」
張國榮曾點醒靚靚為人太直容易得罪人，但靚靚卻入耳即忘，她說：「可能嗰時細個，覺得係咁㗎啦，你哋個個都咁講，可能嗰時再聽深啲記住啲，可能會好啲囉，自己嗰個福份唔夠啦。」
向華勝教投資股票
永盛電影老闆向華勝是靚靚的契哥，雖然靚靚拍永盛電影不算多，但兩人很投緣，好多人都驚身為江湖大佬的向生，但靚靚說：「我就真係見到佢一啲都唔驚，仲覺得佢好搞笑㖭。佢係一個好好嘅前輩，畀好多機會新人，亦都唔會話想喺我哋身上攞任何嘅嘢，以前可能大家都覺得，娛樂圈你可能要同嗰個人做啲乜嘢呀，你先至可以有啲乜機會呀！」
向生還教買股票投資，靚靚說：「佢乜都會識啲，我覺得你喺一個人身上，唔係要得到一樣絕學，就係叫學到嘢，其實睇到佢嘅行為或做嘢態度，你就已經學緊佢啲好處。」
|
鍾意就快D Share啦！
|
|
|
