黎瑞恩確診乙型流感入院留醫工作叫停
本月18日踏入45歲的黎瑞恩（小恩子）流年不利，繼去年12月中因切除腫瘤入院後，前日又因感染乙型流感入院！小恩子現正忙於宣傳4月演唱會，同時又要籌備演唱會及新歌，估計因太操勞加上天氣寒冷，以致不幸中招，醫生亦疑似斷錯症，令她低估病情。聲都變埋的小恩子仍在醫院留醫，手上工作已全部取消，但「女鐵人」仍死撐OK，叫大家放心！
流感肆虐，由今年1月1日至今，本港被流感奪去性命的人數逾百，當中大部分都是感染乙型流感，而歌手黎瑞恩（小恩子）都不幸中招！小恩子確實禍不單行，繼2015年發現有兩個良性胰臟腫瘤後，去年12月中她又入院做切除腹部腫瘤手術，正當她努力籌備4月紅館個唱及新歌之際，前日早上她又因患上乙型流感而入院！
最近天氣寒冷，小恩子近一個月每日都工作超過16小時，加上要減肥，終令身體支持不住，本月開始出現流感病徵包括咳嗽、喉嚨痛等，至前日更入院。小恩子的感恩製作公司昨日上載她戴住醫院手帶的相，並留言：「連拚了兩星期，每日跑7至9個通告，最高紀錄14個通告，天寒地凍下，鐵人小恩終於撐不住病倒了，乖乖地專心醫病喇，祝福小恩子早日康復。」但最令小恩子抱歉的是，本來前日她要與蘇玉華一起拍攝新歌《剩下光年》MV，帶病的她本來堅持如期拍攝，但早上感到非常辛苦，故在醫生建議下立刻入院，留下蘇玉華在寒冷天氣下獨力完成MV。
服特敏福 聲音沙啞
小恩子目前在醫院專心醫病，幸好未有出現併發症，現需服用特敏福治療。當得知生病，公司已立刻將其所有工作取消，8日內共取消約20個工作。昨日小恩子接受本報訪問，以極沙啞的聲音叫大家放心：「OK呀，我瞓咗幾日，好番好多，食啱藥就冇事。」而她所屬的星娛樂唱片公司執行董事Tommy Chu則表示小恩子病情嚴重，可能與醫生斷錯症有關：「以為佢係普通流感，但佢再睇醫生時，醫生要佢立即入醫院。」對於生病原因，他表示多宣傳工作可能令小恩子體力透支，加上斷錯症搞到她身體虛弱。問到何時復工？Tommy坦言：「等佢康復為止，估計兩、三日後復工，但最緊要佢完全康復先要佢做嘢，都希望減啲工作等佢唔好咁辛勞，但佢係任何人搵佢工作都肯做，所以變相工作倍多。」
唔擔心影響個唱票房
問到可擔心小恩子的病情會影響演唱會票房？Tommy坦言：「當然唔擔心票房，亦唔影響進度，因阿恩健康永遠係第一位。我亦相信佢一好番，就會全力投入番進度，佢好睇重今次演唱會，係佢入行25年演唱會，製作令人好值得去睇，反而冇睇先係損失。」提到小恩子缺席拍《剩下光年》MV，Tommy指影響不算很大，因MV主要是拍蘇玉華，又透露今次是小恩子提議找蘇玉華演出：「首歌除咗係小恩子嘅寫照，亦鼓勵好多遇過挫敗嘅女性，我同小恩子都覺得蘇玉華好啱呢個角色。」
文：音樂組
|
鍾意就快D Share啦！
|
|
|