自信與強勢一線之差，蘇玉華坦言自己也有小鳥依人的時候。
探熱針
嫌低質 DQ大台蘇玉華：唔想好捱又拍唔到好嘢出嚟！
《平安谷之詭谷傳說》獲一致好評，網友大讚蘇玉華劇中表現強悍，演活二奶奶宋鳴鳳，帶起晒成套劇。
有指大台見劇集收得，有意開拍續集之際，女主角之一的阿蘇選擇在《平》劇後已同無綫結束 24年的賓主關係。外傳阿蘇近年擔正的劇集買少見少，加上要帶住班新人拍劇，做到無癮，索性疊埋心水走人。
蘇玉華透露希望生命餘下的日子可以做到 quality work，「我唔想唔夠瞓、好捱，拍唔到好嘢出嚟！」蘇玉華說。
新人一樣有火花
繼倉底貨《蘭花劫》後，蘇玉華於大台最後一套劇《平安谷之詭谷傳說》將於本週五播出大結局，劇集叫好，向來嚴選劇本的阿蘇，坦言收到劇本已知套劇「唔會差得去邊」，但意料不到觀眾會有咁大回響。
外間認為大台靠阿蘇提升一班新人的演技，但當事人卻不太認同。「我覺得資歷好淺都係可以同佢擦到無限火花，我唔會用年資去界定佢好唔好戲，我只可以講今次導演搵到啱嘅演員去做啱嘅角色。」
嫌大台低質
蘇玉華自九四年開始已經被大台收歸旗下，多年來一直沒有將她變成親生女（經理人合約），阿蘇笑說，她愛自由，有自己諗法，大台不想自找麻煩。對於二十四年後首度離巢，只輕輕帶過：「想更自由，嘗試其他的事。」
其實大台劇集的質素每況愈下，比起亞洲其他地方大大拋離，不能滿足阿蘇的要求，因為對她來說拍劇不只求名和利，而是發掘生命的一個過程。「如果常常處於嗰種休息唔夠或者拍一啲唔係咁好質素嘅劇本，或者一啲唔係咁好發揮嘅角色，對於我嚟講係一個好大消耗，我希望我嘅時間係用得有價值嘅，我唔想花咗好多時間，唔夠瞓、好捱，拍唔到好嘢出嚟。我覺得自己最安慰係我好渴望進步，仲好想學嘢，仲好想同一啲叻過我嘅人合作，接受更大的挑戰。」
唔使靠獎肯定
《平安谷》的二奶奶劇中表現強勢，現實生活中阿蘇自問不強，有時甚至小鳥依人，任憑另一半為自己做決定。唯一的分別是較一般人有自信，所以她從來不會留意網民對於她的演技評價，因為阿蘇相信只有她才知道哪一場做得最好，哪些有不足，正如她離開大台，膚淺如我會以為同多年來沒有獎項提名有關，但她神氣回答：「嘩！ come on！我唔需要搵一個獎嚟證實我嘅存在價值！」
蘇玉華的離開為了迎接更優質的工作，現時國內拍劇的製作費拍得住美劇，以為她為了北上發展鋪路，偏偏她抗拒至極。「完全唔恨，亦都唔覺得自己要去。可能我太愛香港啦，我喺呢個土壤變成而家嘅我，我一路都係關心香港嘅事物同觀眾，我覺得我要做戲我咪做俾香港人睇囉！我唔覺得我拍俾香港人睇，第二啲地方會見唔到，點解我要去一個我陌生嘅地方，要講一個我唔熟悉嘅語言，去拍一啲我未必好有感覺嘅戲呢？」蘇玉 華說。
藝人北上發展為名也為利，可以抵抗到人仔的利誘，大抵只有蘇玉華！
代表作
出名演技好的蘇玉華，於演藝圈打滾接近二十六年，演過無數電視劇、電影及舞台劇。其中不少 TVB劇更深入民心，令人難忘。
撰文：娛樂組
攝影：胡春輝
化妝、髮型： Winki
服裝： Emma Wallace
|
鍾意就快D Share啦！
|
|
|
