一直以來都係單身嘅劉心悠，被問過無數次戀事，下個月1日號，佢已經37歲，大一歲，佢計劃與同月同日生日嘅媽媽一齊開一個BBQ派對，噚日佢出席一個髮型器發佈會時，再次被問到人生大事：「唔緊要，(你哋)唔覺得o依家咁好有型咩。我覺得自己一個好啲，其實我想跳出呢個框框好耐，我又唔識煮飯，所以唔心急。」心悠話自己唔知道想要咩，所以唔知點揀：「好似你入間餐廳，望個餐牌咁多嘢食，諗咗好耐，冇特別想食咩，可能係選擇恐懼症。」唔通唔食咩？佢又話自己未肚餓，咁點會餓死，佢即刻扯開話題：「今朝食完早餐到o依家未食嘢。呢啲其實唔係最重要，最重要擺咩入口，要有營養，唔可以亂放嘢入口。」咁又啱嘅。
同場出席活動嘅仲有胡琳（Bianca）同胡鴻鈞，Bianca提到早前喺冰島拍MV凍傷，休息咗4，5日，塊面因為皮膚炎出水：「現場都化唔到妝，大家望住我，又唔敢話我知咩事，搞到我差啲喊，之後有人細細聲話我知，仲有3分鐘開始，嗰刻個人直情崩潰。」O依家佢啲皮膚已經康復咗8成，佢仲話自己MV個樣似進擊的巨人：「Cam man睇番個MV見到好搞笑，Cap咗啲圖出嚟P，等人笑吓。」佢仲諗住搞個比賽，選出最有創意同最搞笑嘅圖出嚟，送個福袋俾得獎者，會有佢嘅簽名相，搵晒我屋企平時會用嘅嘢，保佢平安袋。」
另外，胡鴻鈞下周二（27日）28歲生日，會搞生日派對，同粉絲一齊過，「男朋友」許廷鏗同吳業坤會唔會一齊來？「我啲男性朋友，等佢哋約，自己生日唔會主動約。佢亦呼籲一班歌迷唔好送禮物，將錢捐出去做慈善，將收據送俾佢做生日禮物。
精選娛聞，喺晒《娛果》
http://fb.com/appledailyent
| 攝影：陳俊強 | | |
| |
來源 source: http://hk.entertainment.appledaily.com
|
鍾意就快D Share啦！
|
|
|