陳煒謙虛話自己好好彩！
藝人陳煒（煒哥）接受電台訪問，宣傳熱播劇《果欄中的江湖大嫂》，她笑言每日拍攝都充滿歡笑，又話同好多老拍檔再合作，好有新鮮感：「就好似同袁文傑有好多對手戲，主力同佢拍，再見番面好開心，但依家『游生』（袁文傑）嘅事業就似一支火箭咁升上天，記得第一套戲就係同佢做情侶，嗰時有好多嘢都跟住前輩學，不過如果你叫我依家睇番，就真係慘不忍睹。（袁文傑同之前合作有咩唔同？）除咗嗰樣之外，其他都進步好大，成個人都變得沉穩、成熟咗好多，之前佢有好多嘢都淨係識開嗰頭，就唔識收尾，見佢依家都識啦。」
硬食廿幾巴面都痺埋
談及煒哥於《果》中有武打戲份，她即刻變得雀躍表示自己好鍾意拍動作戲，覺得好好玩又好刺激，笑話：「以前成日都會吊威吔同舞劍，都係親身上陣，其實我都幾唔錫身。（戲入面仲要畀張名雅摑十一巴喎﹗）係呀﹗佢本身都唔夠膽打，但我叫佢放心打，其實最後都打咗廿幾巴，打完都覺得塊面好痺。」
自認拍得唔好有待進步
主持人講到煒哥因《果》而人氣再急升，有望問鼎視后，煒哥聞言就話都有留意網民的評語，又謙虛表示自己好好彩，受眾人支持，但仍有進步空間：「有啲位都做得唔係咁好可能大家唔知，有時啲場口係要跳嚟拍，拍嗰時有好多嘢都係估嚟做，睇番都覺有啲接得唔係咁靚、唔係咁順，會朝住令自己進步嘅目標去，至於攞唔攞獎，其實都好靠運氣同緣分。」
----------------------------
東網巨星開咗ig喇，大家快啲follow
https://goo.gl/KGuo2N
來源 source: http://hk.on.cc
|
鍾意就快D Share啦！
|
|
|
