前港姐蘇韻姿為追夢，隻身由加拿大到香港發展事業，雖然中文程度是「有限公司」，要比別人下多點苦功，但為了演戲，縱使辛苦也不怕。雖然如此，蘇韻姿講起對白卻無半點「竹升音」，原來她12歲回香港購物時，被店員收多廿蚊，全因其「竹升音」被當旅客，令她下決心練好廣東話融入香港！
每個人都有夢想，但能夠下定決心同努力去追夢，究竟又有幾多個？蘇韻姿參選2016年香港小姐入行，雖然並沒有任何獎項，但相比其他港姐，她卻最快跑出拍劇開始幕前工作，更有份在無綫處境劇《愛‧回家之開心速遞》飾演「熊心如」一角，她說：「我覺得自己好彩，都未完全適應到喺香港住同工作，就開始拍嘢，拍嘢更加有好多嘢唔識，所以變咗有少少壓力。因為好想做得好，好想話畀公司聽係冇揀錯人。」
網上查廣東話發音
在加拿大多倫多土生土長，蘇韻姿中文只是「有限公司」程度，但為演戲，辛苦睇劇本也不怕，她說：「開頭我搵親戚幫我睇，點知佢睇完一次就唔敢再幫我睇，因為太多，後尾湯盈盈教我用電話會幫我讀出嚟，咁我就邊聽邊睇住劇本，慢慢認到啲字，但有時啲字嘅音都會歪，嗰啲惟有靠現場同事幫我，有時都會網上查吓啲音。」
英語為母語的蘇韻姿，講起廣東話字正腔圓，原來她試過「被騙」，故誓要搣甩「竹升音」：「嗰年12、13歲，同媽咪返嚟香港去女人街行街，買咗舊嘢大約六十蚊左右，之後又喺隔籬嗰檔睇吓嘢，就聽到有人同我買同一樣嘢，但係收四十蚊，我心諗點解要收我六十蚊呢？我好嬲，但我又唔夠膽理論，我知道實係我啲中文出賣咗我，咁我同媽咪講下決心，唔要返到嚟香港畀人知道我係第二度嚟，我唔要人哋話我『以一個竹升嚟講你算講得幾好喎！』我唔要咁樣，我要人話我啲中文講得好好，自己慢慢學，自己錄低啲中文自己聽番，自己慢慢研究點樣去咬正少少，慢慢改，真係落咗好多苦功。」
家人誤會發明星夢
下過苦功，現在蘇韻姿憑《愛》劇受到網民關注，一切都得來不易，原來家人曾以為她發明星夢，但最終說服家人，並用行動證明並非如此：「我好鍾意演戲，好想做一個表演者，所以我讀大學都好認真咁揀科。嗰陣同媽咪有個協議，佢話至少要大學畢業，先安心畀我演戲，咁我就完成學位再嚟香港。佢哋就會覺得呢個女係認真。（有冇諗如果失敗會點？）我有諗過嘅，因為我母語係英文，咁我可以幫人補習，或者去其他亞洲國家教英文，應該都OK嘅。」
場地：Mini Hotel Causeway Bay
|
鍾意就快D Share啦！
|
|
|
