好Sweet呢！
藝人林子善與太太董佩欣今日擺喜酒，一對新人於下午五時半見傳媒。身穿紫色西裝的林子善與太太咀足1分鐘，讓記者拍照。談到今晚筵開63圍喜酒，子善謂：「原本50圍咋，之後好多朋友都話嚟，所以加到依家63圍，冇得再加，都要同一啲想嚟嘅朋友講唔好意思。」
今次婚禮花掉7位數，子善表示儲錢儲足兩年，打趣說：「除咗無綫返工外，我出面都有跑山搵錢，慳啲使囉，結婚我唔會理賺定蝕嘞。（幾錢開門利是？）本來係9,999嘅，我加咗點變成9.999，我覺得我老婆係無價嘅。接新娘易過借火，啲姐妹一見到袁偉豪，門都開咗三分二嘞，再見埋馬明及嘉穎，就差唔多自動開門。玩新郎時我食咗鹹竹蜂，咳到口水鼻涕一齊流。」
係咁眼濕濕
對於未來要與太太共度餘生，子善愈講愈眼濕濕：「要做好自己先，我唔想空口講白話，行動最緊要。要愛惜自己身體先，先可以照顧到太太，走埋下半生。頭先我未講愛的宣言已經喊，斟茶畀外父、母好動感，我自己太易喊嘞。姐妹們有畀嘢叫我跟住讀，但我唔想，因為唔係出自真心，但我講自己想講嘅，講三句又喊！」
當問到太太畀子善幾多分，她謂：「100分。」子善即謂：「畀80分夠嘞，咁先有進步空間。（努力造人？）我唔得，暫時未得住，想小朋友第二日生活成長環境好啲，下年啦，太太同外父母都好鍾意小朋友。」至於董佩欣手上的1.6卡鑽戒，子善表示：「買唔到最大嘅戒指，但呢隻無論顏色及切割都係完美嘅，佢值得我買畀佢。」
----------------------------
東網巨星開咗ig喇，大家快啲follow
https://goo.gl/KGuo2N
來源 source: http://hk.on.cc
|
鍾意就快D Share啦！
|
|
|
