熱爆娛樂: 【疑因沖繩註冊洩出世紙】「巨聲幫」劉威煌捲罵戰被屈歧視「新生港人」 _

2018年4月5日星期四

【疑因沖繩註冊洩出世紙】「巨聲幫」劉威煌捲罵戰被屈歧視「新生港人」 __,劉威煌,巨聲幫,

個人資料真係要小心處理，一個唔好彩俾人盜用咗可大可小，如果自己放埋上網，就更加不智。

連登討論區兩日前有一位網名叫「Ching _ _」嘅網友開咗個post，標題係《真香港人的認證八成連登仔出世紙都冇呢個徽號》，內容係好簡單，只係得一張輕輕blur咗嘅出世紙，呢張出世紙仲有英殖時期香港盾徽，附帶一句「97前=香港出世 97後=支那出世」。

有人好快手將相片Del Blur（即移除薄格），見到出世紙上父親係姓劉，而喺「出生登記後所加之名字」一欄，由「威雅」改咗名做「威煌」……矛頭直指巨聲幫嘅歌手劉威煌。好多留言都以為呢位「Ching _ _」就係出世紙持有人——即劉威煌，仲笑佢無啦啦自爆身份。話咁快仲有連登仔開多咗個「整合post」（懶人包），仲推咗上熱門post。

但亦有神通廣大嘅連登仔順藤摸瓜、喺一個日本翻譯網搵到同「Ching _ _」呢張一模一樣、薄格blur咗嘅出世紙。咁呢個網站係咩嚟呢？就係2014年一個廣告，介紹香港人去沖繩結婚，教埋你要提供乜嘢身份證明文件。廣告中刊登嘅其中一張出世紙，冇錯，就係「Ching _ _」喺連登貼嗰張。因為網站只係將個人資料以薄格處理，所以只要稍稍推下色，就會清楚見到出世紙上劉威煌個名。

的確，劉威煌喺2014年1月，同富家女友Sandy喺沖繩註冊（新聞連結： https://bit.ly/2q7uEeT ），Sandy屋企人喺大陸經營礦業生意，曾有報道指女方唔單止手持多個物業、名下仲有五間公司，業務以貿易和投資為主。

咁，「Ching _ _」係咪即係劉威煌本人？劉威煌話唔係。換言之，應該係「借刀」。唔少連登仔都馬上留言向劉威煌道歉。

劉威煌今日接受《蘋果》訪問，佢話：「嗰張出世紙係我嘅，係當日登記註冊要交嘅文件，我諗只係有人想用嚟做example，又唔知我都算係公眾人物，咁啱得咁橋啫！」

講到無端被擺上枱，劉威煌就話：「真係好無奈，我睇番要有好多巧合先會變成咁，亦都冇諗過可以將blur咗嘅嘢還原，總之成件事得啖笑，唔係我post上網。」

至於嗰個推介香港人去沖繩註冊嘅日文翻譯網，今日就改咗內容，將劉威煌張出世紙打番厚格，未知係咪連登仔「做咗嘢」。

早兩日，有連登仔貂咗一張出世紙，話出世紙有香港盾徽嘅先叫做香港人。	好快有人del blur，見到出世紙主人叫威煌，而爸爸姓劉。	當所有矛頭指向劉威煌，再有人發現喺一個日本翻譯網最先流出呢張出世紙。
劉威煌承認張出世紙係佢嘅，可能係14年喺沖繩結婚時交過呢啲文件，當地人拎咗嚟做例子。（資料圖片）	佢話要有好多巧合先會變成咁，總之唔係佢post上網，而日本網站都加厚番個格仔。