「會開始好記得母親節，以前都記得嘅，但好似無咁深刻，就可能係同媽咪食餐飯，但自己真係做咗母親之後，可能做嘢嗰時會有好多人不斷提你就嚟母親節喇，就覺得係喎，我記得上年無乜特別慶祝，帶咗佢去動植物公園，因為佢好鍾意睇雀仔，唔知點解佢好鍾意雀仔，所以就帶咗佢去，都係一齊過無咩特別慶祝。」唔少人認為Yumiko唔識湊女，但當佢拍完內地真人騷後，改變咗唔少人嘅睇法，Yumiko自己點睇呢？「呢個騷對我嚟講都係一個幾有紀念性嘅節目，可以俾佢長大後睇番，你細個係咁難搞嘅，你睇吓媽咪幾崩潰，我覺得都係一個經歷，對我嚟講係成長咗好多，譬如去到中段嘅時候，發覺自己原來係會咁不知所措，到後期慢慢改進，又用啲唔同嘅方法，原來都可以喎，即係搵到個好嘅方法，所以係幾好嘅。」
Yumiko認為自己係個幾多分嘅媽咪？「八十分仲有進步嘅空間！囡囡就好sweet，而家有時朝早我瞓醒，佢會攞一支花送俾我，當然佢係喺我嘅花樽掹出嚟，但係感覺都係好開心嘅。」Yumiko以前好抗拒小朋友，接受咗自己做咗人媽咪未呢？「開始接受，初初有咗小朋友嗰段時期，就覺得點解自己會做媽媽嘅？好驚唔知會點樣，呢個都係自己人生一個經歷。有時會緊張教育方面，點樣可以教導佢成為一個對社會有用嘅人，呢啲要睇好多資料、好多書，或者現實生活中多啲觀察，呢啲真係要慢慢學。」
咁Yumiko有冇諗過生多個陪吓梁浸浸呢？「呢個其實真係好矛盾，有時望住陳真覺得，呢個咪係我想要嘅仔囉，我咪有囉，佢有個伴囉，其實又好似夠喎，頭先都有諗，生多個我係咪可以handle到？兩個喎，開生日會有五個小朋友都已經覺得頂唔住，即係兩個日日喺屋企，我暫時未想像到自己係咪可以做到。我又唔係一啲會去擔心好多嘢嘅媽咪，我會覺得一生人總要經歷好多嘢，我擔心唔到咁多，唯有可以教到佢去做一個善良嘅人，遇到咩嘢事都可以用自己嘅方法去解決，唔好做壞事，佢之後遇到任何挫折，我都希望佢會自己去經歷。」
採訪：肥A
攝錄：蕭敬漁
化妝：Yannes Lee @ ndnco.co
髮型：SingTam（Pi4.Hk）
服裝提供：Tibi
場地提供：SOGNO CAFÉ @ 中環（Tel：27579878）
立即按此連結下載APP：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|