【Happy Mother's Day】現年68歲的薛家燕經常在劇集中演活「媽打」角色，現實生活她是一位單親媽咪，95年跟前夫石保慶離婚，她復出養大三名子女。家燕姐的子女先後投入社會工作，31歲的二子石耀庭（Jackson）下月11日將迎娶25歲教師女友陳素怡（Zoe）。Jackson與Zoe日前到柴灣向咖啡達人Pauline拜師學沖精品咖啡孝敬媽咪。
即將升呢奶奶的家燕姐一邊品嚐着兒子為她手沖的咖啡，未喝新抱茶的她即笑言口水湧出來。當家燕姐翻看子女兒時發黃舊照，眼濕濕的她慨嘆：「時間過得好快，我初初仲諗點養大佢哋，𠵱家成家立室，係有經歷艱苦，但當中也有快樂嘅時光。」
| | | |
嚴格教子女
母兼父職的家燕姐捱過辛酸：「我離婚復出第二年母親節，一日跑五個活動，呢日應該同仔女過，我根本冇時間，嗰晚返到屋企11點幾落妝，大女帶住細佬妹拎玫瑰花同紙包蛋糕，同我講『母親節快樂』，我都冇同佢哋過母親節，但佢哋記住媽咪返嚟要同我過，我當時好開心，但個心同時好酸。我攬完佢哋，就叫佢哋返房瞓，我就暱喺廁所爆喊。」家燕姐工作雖忙，但都嚴格管教子女：「我好擔心佢哋學業，會鬧會打，細個佢哋唔識分對與錯。」
Jackson非常孝順媽咪，他計劃結婚便決定搬到母親隔壁，家燕姐說：「我年紀大，日後真係可能要人照顧，呢樣令我好感動。」家燕姐爆料指第一次見Zoe便認定她是未來新抱，大讚她乖巧：「佢冬天會買保暖內衣畀我，好感動。
唔心急抱孫
經歷過失婚的家燕姐，不忘勉勵一對新人：「希望佢哋恩愛、甜蜜。有時唔知大家生活習慣，婚後一齊住要互相適應磨合，男仔要當起個家，一定要負責任，錫老婆。女嘅就要幫先生，分享愛，每個人都有佢優點、缺點，要學識搵對方優點，包容缺點，互相體諒。」家燕姐坦言不心急抱孫：「唔想畀佢哋壓力，我都好長命，順其自然。」
採訪：陳杰
攝影：葉君海
場地提供：Pokka Cafe
|
鍾意就快D Share啦！
|
|
|