【Happy Mother's Day】下月48歲的大美人李嘉欣，08年嫁給富豪老公許晉亨，現育有7歲兒子Jayden，成為幸福靚媽咪。李嘉欣日前接受《蘋果》專訪，罕有講到當年媽咪單親打工湊大她們，三母女曾經住鐵皮屋，李嘉欣亦從14歲開始過着半工讀生活。現年80歲的嘉欣媽媽同樣高顏值，李嘉欣更自爆三母女會交換衫着，大讚媽咪新潮。
李嘉欣今年2月在社交網貼出一張慶祝李媽媽生日的合照，更爆出原來媽媽已80歲，皮膚白皙、體態樣子凍齡的李媽媽，看來像六十幾歲，即被網民形容為「逆天嫩臉」。李嘉欣的高顏值及優雅氣質，超強基因完全遺傳自媽媽，她笑說：「有個小插曲，就係我post咗之後，我媽咪係少少不滿『點解你要同人哋講我80歲，我啲朋友冇人知我幾多歲㗎！』佢唔係太滿意囉！其實，我係覺得好光榮，因為媽咪唔止個樣，健康、思想啦，各方面好似六十幾歲。」媽咪更告誡她不准隨便刊登她的相。
李嘉欣驕傲晒媽，三母女感情非常好。李嘉欣童年時有工人湊，後因葡萄牙籍父親移情別戀離家，媽媽要打工養家，三母女曾經要住鐵皮屋，李嘉欣14歲亦開始半工讀。單親家庭雖然辛苦，但也有開心日子，她說：「我哋同爸爸係一齊住到十幾歲，佢哋先分開，媽咪好辛苦咁養大我哋兩個。開心嘅畫面好多，快樂嘅回憶好多，我最記得，我好鍾意食西瓜，生日時，我唔想要蛋糕，寧願要西瓜，咁媽咪就會買西瓜，切咗一半，擺好、插蠟燭，我覺得係好開心嘅事！」
| | |
西瓜當蛋糕
回到童年時，嘉欣媽媽對她們打扮自小要求高，李嘉欣笑說：「由我細個到成長，到𠵱家我成為媽媽，佢都要求我不可以烏𢱑咁出街，少着波鞋、多着高跟鞋。」小時候李嘉欣更被規定出街一定要着裙：「weekend時，因為媽咪仲要返工（當年任會計師），咁工人姐姐幫我哋襯衫出街，由農村姐姐品味襯嘅衫，佢係覺得唔得，有時會送返我哋返屋企，換返佢幫我哋襯嘅衫，先可以出嚟同佢飲茶，係好嚴謹。」
李嘉欣坦言，沒有遺傳到媽咪愛美執着的打扮習慣，不過三母女間中會交換衫着：「媽咪係好新潮、好update的人，有啲我覺得好靚嘅舊衫，佢會照丟咗，我哋覺得好有紀念價值嘅首飾，佢一樣會拆晒佢，轉款。」
丟囝囝禮物
每年母親節，李嘉欣都會和奶奶、媽媽一齊食飯，今年亦不例外。問到李嘉欣作為人母最難忘的三件事，她說：「最難忘可以講係佢出世嗰一刻，因為之前真係picture唔到會有個人仔，喺手術室擺咗喺你隔籬，仲喺度喊，嗰個係一個好震撼嘅畫面，真係好難忘。」其次是囝囝考小學的忐忑和擔心。第三件事則是首次收到囝囝親手做的禮物：「嗰刻真係好開心，𠵱家我就好衰，Jayden間中會送咗啲唔係好睇得明嘅藝術作品畀我，唔想嘥位，只係影低就丟咗喇。」李嘉欣坦言，囝囝怕她多過爸爸許晉亨，有時亦要同步管理老公，但感覺幸福：「我有嚴肅一方面，但惡得多都會攰，有時都會用朋友之間方式相處，但母子之間唔係真係朋友，我需要管教佢。」
採訪：林妙萍
提供腕錶：Audemars Piguet
化妝：Omix B
髮型：Nichol Yip@HAIR
|
鍾意就快D Share啦！
|
|
|