陳法拉喺2014年毅然離開娛樂圈重返校園，遠赴紐約入讀當地著名學府Juilliard School茱莉亞學院攻讀戲劇課程。眨吓眼4年已過，噚日終於嚟到畢業嘅大日子，法拉在最後一個學期以全科A成績獲頒MFA (Master of Fine Arts) 戲劇表演碩士，成為首位獲得該校戲劇表演碩士嘅華人學生。
法拉喺ig直播畢業典禮過程，見佢着住黑色畢業袍、戴上四方帽笑容燦爛。而法拉嘅父母亦有到場觀禮，從台上接過畢業證書嘅法拉，落台後難掩心中興奮，連聲大叫：「畢業喇！我畢業喇！終於畢業喇！hoo .....完成」
法拉留言：「不知不覺間四年如此飛快的過去，這刻我在juilliardschool 終於畢業了！我感謝這四年間鼓勵我的家人和朋友、為我提供了知識和靈感，成為一名更好的藝術家的老師們、香港的工作團隊、客戶、為我打氣的fans，大家一直給我支持，沒有你們，我不能一個人走到今日。我是一個非常幸運的人，在我的生命中擁有你們所有人。」法拉仲透露前日上最後一堂時，剛好由奧斯卡影帝Daniel Day-Lewis嚟咗學校以導師身份教演戲，讓佢獲益不少，並上咗畢業前寶貴嘅一課。
完成畢業禮後，當然唔少得與一班同學仔影大合照，仲有愛貓都有喺畢業證書上留影，真係好開心。法拉早前透露畢業後會回歸幕前，拍劇同電影都無任歡迎，相信好快就可以再見到法拉演出。
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|
