王宗堯「錢」途未卜女友送外賣陪捱飯盒
王宗堯與嫩口女友蘇皓兒（Chloe）拍拖近一年，早已共賦同居，不過男方快將約滿蕭定一旗下公司，前路未卜，最近更加慳住使減少出街，日前他便咕喱上身，拿着大包細包物品返愛巢，體貼的Chloe之後便「送外賣」上門餵飽男友，齊齊捱飯盒。
39歲的王宗堯向來緋聞多多，近年與年輕15載、外表清純的24歲前As One成員Chloe相戀，為爭取相處時間，二人於銅鑼灣唐樓築愛巢。而早前傳出所屬公司力捧同門張建聲，而遲遲未與王宗堯傾續約，尚有半年便約滿的他前景未明，最近慳得就慳。日前下午4時半，他獨自駕車直駛寓所附近的停車場，泊車後便拿着數袋物品步行返家，沿路邊行邊講電話，極為狼狽。
Chloe頭耷耷
王宗堯回家約半小時後，Chloe為免男友勞碌頻撲，便獨自離家往買外賣，戴眼鏡、素顏的Chloe，單拖步往附近一間平民化快餐店，極速買了兩個飯盒便離開，期間引來不少男士目光，Chloe即顯得避忌頭耷耷，急急腳上樓與男友齊齊捱飯盒。至另一日，王宗堯孖女友於傍晚時分離開愛巢，不敢胡亂花費的他，亦只於附近茶餐廳拍拖醫肚。
「唔使成日食好嘢」
王宗堯事後接受本報訪問，提到與女友慳住使捱飯盒，他說：「好嘅咪食好啲囉，唔好嘅咪正常、普通啲囉，唔使成日食好嘢嘅，我冇所謂，加上我不嬲都唔大使嘅，應使得使。」提及公司仍未與他傾續約，他說：「前途方面就唔係好擔心，咁有公司幫手當然好，其實好多細節都要傾，呢啲嘢唔急得嘅。」
富三代戀史多籮籮
王宗堯是名副其實的富三代，父親經營飲食行業，擁有數間餐廳，有指其祖父曾開麻雀館及礦場。他在英華書院讀到中三後，便到英國升學，曾入讀名校倫敦帝國學院及倫敦大學學院。雖然出生富裕家庭，但王宗堯不靠父蔭，因鍾情演藝事業而曾赴台灣做模特兒，約滿後返港簽約於蕭定一旗下，拍攝電影《喜愛夜蒲》及《一路向西》而為人熟悉，其他作品還有電影《導火新聞線》、劇集《選戰》等。
而其情史亦厚過數簿！他承認的圈中女友包括陳靜、模特兒黎紀君、女星蔡潔及已退出娛圈的「浸大E神」楊焉（前名楊梓瑤），除了鍾情身材出眾，其前度都與現任女友Chloe一樣屬眼大靚女，但不少戀情都過不到一年。
文、攝：追蹤組
|
鍾意就快D Share啦！
|
|
|
