徐子淇今晚到灣仔一間酒店，出席珠寶品牌Cartier晚宴，Bruno Mars是夜仲擔任表演。
見到李太出現，傳媒當然先問下佢嚟緊點慶祝母親節啦，子淇就話通常都係同媽咪、奶奶及小朋友一齊食飯嘅。「之前我跟Save The Children去探訪，發現全球好多少女係童婚，係18歲以下嘅少女，結咗婚仲生埋BB，係好後生嘅媽媽。我覺得咁樣係好影響少女嘅一生，因為佢哋冇咗做兒童嘅權利，基本嘅返學都唔能夠返，亦好難脫離貧窮。」
子淇又心痛謂，見到有好多可能得11、12歲嘅小妹妹，要嫁俾年長過佢哋好多嘅男人，仲要生BB。「喺生產嘅過程，有啲BB會不幸過身，有時大嗰啲（指媽媽）都會過唔到。希望大家都可以關注佢哋。母親節係一個好開心嘅節日，但世界上好多母親都係需要幫忙。」
子淇又表示下周會帶同小朋友去柬埔寨探望，幫佢哋擴闊視野。咁小朋友會唔會送啲小禮物俾你？佢就話：「佢哋會畫下卡、整下曲奇，我已經好開心。」珠寶就不需要喇，「母親節最緊要係心意啦。小朋友同我哋一齊，已經好開心喇。」
提到二家姐本月16號就8歲生日，屆時會否開派對慶祝，子淇話會食下蛋糕咁啦，不會俾太多物質佢哋：「由細到大都唔會（指俾太多物質獎勵），有屋企人、同學仔陪佢哋玩，就唔使咁花巧。」
談到會否介意女兒早婚，子淇就話結婚最緊要係緣份，總之唔好未成年結婚就OK，又話唔介意早啲榮升外母：「生個孫俾我啦，我好恨0架。」咁佢會否再追多個小朋友？子淇就謙稱唔會喇：「追唔到喇！等佢哋生個孫仔啦。」又話會留番啲珠寶俾未來新抱0架喇。
精選娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|
