「我有時覺得點解你咁曳㗎，跟住諗番，咁我以前好乖咩？係喎，都正常嘅。聽我爹哋媽咪嘅口脗就覺得有啲似嘅，但佢比我更加有主見，我細個都會比較聽爹哋媽咪講，佢就開始好有自己嘅主見，或者砌積木唔會跟原本幅圖嘅指示，會砌自己心目中鍾意嗰個形狀。」喺照顧梁浸浸嘅過程中，Yumiko有冇喺個女身上學到啲嘢？「我覺得實在太多喇，學識點樣去照顧人，我諗以前唔覺嘅，覺得自己都應該識得照顧人，但原來唔係，我係喺呢幾年學識嘅，或者有時自己好幸福，身邊會有好多照顧自己嘅人，或者願意去錫我嘅人，變咗最初以為自己識，原來唔係囉，而家就真係嘞，真係覺得可能佢係上天俾我嘅一個學習課程，令我更加學識點樣可以去照顧人，更加有耐性，喺佢身上學到好多嘢。」
Yumiko講起梁浸浸，笑得很甜，就算講起好多時俾佢激親，依然係笑哈哈。「即係原來你惡過佢係無用嘅，因為佢好男仔頭，佢無好驚一個人，反而係鍾意講道理，我細個其實都係咁樣。我要冷靜咗自己先，我會叫佢冷靜啲，跟住諗吓其實係我自己激動，咁細個邊識得冷靜，都係慢慢學啦，而家會有啲方法去同佢相處，以前試過會比佢更大聲更惡，但發覺唔係太work，唔係個個得，要同佢講道理。」Yumiko做咗媽咪之後，有冇拉近咗同媽咪嘅距離？「會，一定會，就我自己嘅屋企環境，我覺得係好深刻嘅，因為我同媽咪分開兩個地方住，佢慣咗喺上海生活，我就慣咗住喺香港，變咗我哋成日分隔兩地，無小朋友嘅時候，我哋一年可能都係新年，或者只係見兩三次，每次可能一兩個禮拜，但有咗梁浸浸之後，我哋而家一年差唔多見到半年，即係每隔兩個月會見一次，而家會好有一種家嘅感覺。」
趁母親節就快到，Yumiko有冇嘢想同媽咪講？「做咗媽咪之後我真係更加感受到，細個嗰陣時你對我係點樣操心，所以好多謝你，用咗咁多心機去教育我，而家係我回報嘅時候，母親節快樂！」咁Yumiko又有冇嘢想同梁浸浸講呢？「咩嘢都唔緊要，最緊要孝順，OK？」
採訪：肥A
攝錄：蕭敬漁
化妝：Yannes Lee @ ndnco.co
髮型：SingTam（Pi4.Hk）
服裝提供：Tibi
場地提供：SOGNO CAFÉ @ 中環（Tel：27579878）
立即按此連結下載APP：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
