「已不知成為習慣 呆坐孤單的空間
似有意無意錯過了時限
這餐室人潮漸散 寥落加一點嗟嘆
似轉眼轉了痛苦的空間」
《留給最愛的說話》結他聲響起，多年之後，原唱張麗瑾悠悠地唱出這首歌，勾起80年代的集體回憶。
張麗瑾不是唱家班，不是靚女，更曾被倪震笑醜樣激到喊！商台DJ出身的她，主持過《日本流行情報》，是80年代日本文化代言人，當年軟硬天師初入商台，加入張麗瑾主持的《飛越癲狂院》，三人的化學作用令聽眾笑爆嘴。之後張麗瑾為廣播劇唱主題曲《留給最愛的說話》，加上鄭丹瑞的深情獨白，令歌曲成為經典。
曾經享受過掌聲的張麗瑾，91年離開商台後進修日文、法文、學畫畫、書法、陶瓷、雕塑，生活比以往更實在，年逾50的她回首前半生：「我做過港台、商台、新城，但唔使問，一定商台感情最深厚，我嘅娘家。我係發夢嘅人，成日織緊夢，有時啲夢未必如願以償，我又唔會話實現唔到夢想覺得失敗，唔緊要，我追過第二個夢，於是做咗家庭主婦，跟住到阿仔出世，我反而返港大讀語言系，主修日文，副修法文，因為大學教育啟發性好大，發覺冇啱同唔啱，睇你點去取捨，學習時覺得人生好豐富。」
讀港大時，老師挑選麗瑾代表大學參加辯論比賽：「可能我把聲容易說服人，我篇文章又寫得好好，所以揀咗我，用日文去講，老師話之前幾年都係中大攞第一，到我參加攞番第一名為港大爭光，好開心！我好鍾意研究語文，但讀完大學之後竟然冇用到，跟住鍾意藝術，見到周慧敏學畫畫，我用5年時間學咗油畫、水墨畫、書法、板畫、陶瓷、雕塑，其實好皮毛，但好鍾意。」
當年麗瑾為商台主持《飛越癲狂院》，剛入行的軟硬天師加入節目初試啼聲，三人擦出火花，節目大受歡迎：「佢兩個真係好搞笑，記得嗰時監製話：『呢兩隻嘢係癲嘅，啱晒你麗瑾，你都係癲嘅！』同佢哋合作學到好多嘢。」不是兩個後輩向前輩學嘢嗎？麗瑾說：「錯嘞，其實我跟佢哋學嘢先啱，佢哋令我好唔得閒，第一，佢哋返到嚟，由頭望到落腳係好多變化，忽然乞衣頭，一陣又乜嘢髻，衫又唔知乜嘢潮牌，我哋呢啲比較乖，見到靚嘢望吓都好。節目有個劇，記得有次話屋企冇米點算，阿葛扮阿婆聲：『唔緊要，你洗個面，成面咁多走米，就攞啲走米嚟煮飯』同佢哋一齊好開心，古靈精怪，反應好快，思想敏捷，有成就係必然，到o依家都好掛住佢哋。」
離開電台後，麗瑾曾跟倪震為亞視主持《熱門週末派》，該節目導演梁錦源在專欄爆料，指麗瑾曾衝出錄影廠哭訴：「我是醜，但也不用這麼拿我來說……」問到當年是否被倪震激到喊？麗瑾厚道說：「冇呢個印象喎，倪震口花花嗰啲，有時講嘢唔就你女仔，佢當我男仔，唔靚女有乜所謂，我知自己唔靚女，我重視個心係善良，男仔梗係鍾意黐靚女，我冇所謂，不過我諗我唔係好適合去電視圈子。」
所以，麗瑾逃離娛樂圈20多年了，樂觀的她說：「叫我諗番冇一樣唔開心，紀念嚟，多謝上天安排我試過呢個經驗，唔好要求自己紅透半邊天，一首歌hit到咁，一個節目hit到咁，仲冇乜特別要求，但如果可以有得再做一個節目，我諗都鍾意嘅，嬉笑怒罵分享人生真諦，將眼光睇遠啲，心情變靚啲。」
精選娛聞，喺晒《娛果》
http://fb.com/appledailyent
| （右圖攝影：陳俊強、攝錄：林賓尼） | | |
| | | |
| | | |
| | | |
| | | |
| | | |
|
鍾意就快D Share啦！
|
|
|