徐濠縈、吳千語、陳漢娜、王敏奕、林愷鈴與鄭融前晚現身尖沙嘴，出席Fendi時裝活動，阿徐身穿黑色bra top輕露小蠻腰示人，原來她近日勤力操弗，更影響到老公陳奕迅（Eason）減肥，她說：「大家年紀唔細，都係時候，佢成日話自己唔係肥，但我挑戰佢，要佢緊致番。最近劉浩龍幾個月減咗30幾磅，唔只瘦仲有線條，唔使老公做到佢咁，佢𠵱家170幾磅，瘦番啲，眼望埋去弗就得。」
老公怕被鬧
阿徐爆料指Eason搵了當年為張家輝操成肌肉人的健身教練Michael幫手，每星期操三日，又笑指Eason驚被她鬧，所以積極搵教練度期，她說：「呢件真係2018年最開心嘅事，同佢一齊幾十年都唔肯，不過我澄清佢係有打羽毛球同網球。」問到如何獎勵老公，例如生B慶祝？她說：「其實我哋已經傾咗條件，不過唔講得。生B唔喇，我太老，有六嚿腹肌好過大肚。」
男友非工人
同場的千語透露現在多於北京工作，更自爆家中甚亂，必要時才做家務，問到會否嚇怕男仔？她說：「又冇，好似冇人嫌棄過，可能未到好差。」問到會否物色住家男？她說：「好似唔係好需要，男友嘅作用唔係工人。」與林峯分手後至今，與內地富三代、前全國政協施子清長孫施伯雄傳緋聞，千語說：「食飯啫，每次食飯都話係，都要畀吓機會了解。不過成日飛，好難進一步了解，睇緣份。」問到是否與施伯雄了解中？她說：「我哋一直係朋友，識咗好耐。」
採訪：羅慧敏
攝影：仇志德
|
鍾意就快D Share啦！
|
|
|
