96年憑參選亞姐入行、兩年前轉投TVB嘅張文慈（Pinky），最近有份喺《宮心計2深宮計》中飾演汪司饍。Pinky近日接受商台《1圈圈 星光背後》訪問，提到當年選完亞姐後，因為一篇專訪揭露曾被「迷姦」哄動一時，結果被亞視雪藏。佢話：「其實已經唔係我能唔能夠講呢件事，而是近日又再被翻炒，我唔想被人覺得我拎來嚟造宣傳。當時我覺得自己好醜、好害怕、好不開心，嗰時真係唔識得如何處理。公司藝員部可能誤會咗我，都好難怪佢哋，因為我自己都有責任，只怪自己笨。」
張文慈四歲父母離異，由祖母一手撫育佢同兩位弟弟成長，佢坦言家貧，入行都係為咗肩負養家責任。但當年被雪藏，收入完全停頓，故此無奈接拍咗王晶電影《強姦3之OL誘惑》維持生計，佢話：「嗰時年紀仲小，冇安全感，只覺得如果我唔拍(《強姦3》)嘅話，以後就唔能夠拍。講真，『有頭髮，邊個想做癩痢？』，拍攝時，真係一啲都唔開心。但我當時覺得，唔拍就冇路行。所以當時我覺得自己嘅人生好委曲，我真的行錯好多路！」
之後，張文慈被冠以「三級女星」，但佢重申《強姦3》只係二級半電影：「我要澄清，我從沒拍過暴露的三級片！」
2010年離開亞視北上發展，同年因為見朋友轉變亦成為基督徒，令一向缺乏愛嘅佢，尋回生存價值。佢話：「我曾經諗過唔知為乜而生存，但我有一個生存嘅理由，就是嫲嫲，係佢養大我，所以我要養佢報答佢。唔係為親人，我死咗九次！我真係有諗過自殺，就係嗰段被雪藏嘅時間，有一日我坐喺窗口，真係好想跳落去。」
另外，張文慈至今單身多年，佢覺得或者同演壞女人角色太多有關，佢話：「我多數吸引壞男人，每個男人都以為我好嗲，其實我好男仔頭，入行以來拍過拖嘅男人，一隻手數得晒！信主之後，我都係單身，亦被標籤『剩女』，但我一啲都唔怕，一啲都唔擔心，因為我活得好精采，最重要活得好開心。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|